Tuir Xefe Estadu, Diretór Eskola Portugué ne’e, hanesan ema ne’ebé iha kualidade lideransa no matenek.

‘’Acácio José Azevedo de Brito, Diretór eskola Portuguesa de Dili durante tinan hitu, sempre halo servisu iha ita nia rai, nu’udár diretór eskola ne’ebé matenek no kualidade lideransa hodi lori eskola Portuguesa sai koñesidu iha mundu. Ezemplu ida mak, estudante Timor-oan iha konkursu internasionál Matemátika, rai 30 resin hola parte ho estudante rihun 40, nia sai manan na’in ba da-haat iha mundu,’’ Louva Xefe Estadu Horta.

Xefe Estadu mós destaka dedikasaun husi kondekoradu, bainhira Timor-Leste hasoru dezastre naturais iha tinan 2020.

“Durante inundasaun, Dr. Acácio ho nia ema mak salva estudante sira bainhira moru ne’ebé monu no bé tama eskola bainhira aula la’o hela. Nia halo atividade oin-oin ho kualidade tambá ne’e dedikasaun tinan hitu, ha’u deside kondekora,’’ Tenik.

Acácio de Brito agradese ho matan-wen medalla ne’ebé nia hetan, “Agradese tebes ba señor prezidente, hanesan figura Prezidente ba povu tomak. Ba ha’u agradese tebes tanba durante tinan 18 nia laran, kuaze tinan 8 servisu iha eskola portugueza dili, ho difikuldade maibe haksolok tebes, se karik halo persentajen ruma, 9,9999. 0,1, ha’u nem moras, la iha tan seluk, sempre, sempre gosta Timor. Timor sempre iha hau nia fuan. Momentu murak iha tinan sira ne’e laran, hau moris,” Expressa Diretór ne’e.

Medalla Ordem Timor-Leste kria iha Tinan 2009, bazeia ba dekretu-lei númeru 20/2020 ho fó prestíziu no dignidade, fó rekoñesimentu bá pessoál nasionalidade nasionál no estranjeiru ne’ebé husi atividade profissionál no sosiál kontribui ba benefísiu Timor-Leste, sidadaun no humanidade.