Deputadu Bankada Fretilin, Antoninho Doutel Sarmento, preokupa iha Munisípiu Vikeke família sira hulan pasiente inan isin-rua hodi hala’o tratamentu no iha Munisípiu Ermera família pasiente ense rasik kombustivel ba ambulánsia hodi transporta ba sentru saúde.
“Semana kotuk, iha 9 Juñu 2024, ema balun husi suku Liaruka ba halo nia-feto ba ospital iha sub-distritu Sidade Ossú, maibé laiha karreta ka ambulánsia atu transporta inan-isin-rua ba ospitál. Ministra-saúde nian haree kona-ba problema ne’e, ohin-iha, la iha ambulánsia iha ospitál ka iha falta kombustível,” Preokupa Deputadu Bankada FRETILIN, Antoninho Doutel Sarmento, iha plenária Parlamentu Nasionál, Tersa (11/06).
Nia hatutan, família sira tenke hulan inan-isin-rua (Gravida) ne’e husi Suku Liaruka ne’ebé dook husi postu administrativu Ossú, munisípiu Vikeke. Tan ne’e nafatin husu ba Ministériu Saúde hodi haree asuntu ne’e ho seriu.
Iha fatin hanesan, Deputadu Bankada PLP, Adolfo Martins, lamenta populasaun iha Aldeia laulema, Suku Urahou postu Administrativu hatulia B, Munisípiu Ermera, ense rasik kombustivel ba ambulánsia hodi transporta pasiente isin-rua ba sentru saúde Gisarulo.
“Maibé komunidade sira husu atu sira mak ense rasik mina ba ambulansia mak fóin bele lori sira mai sentru saúde, señór vise ministru, komunidade sira sente ladun kontente tanba governu ida ne'e kada tinan tau osan boot ba ministeriu sira hotu, maibé situasaun ida ne’ebé agora komunidade sira hasoru ne'e att liután se mina de'it laiha para ambulánsia ba tula pasiente sira, oinsá ho populasaun nia moris,” Hateten nia.
Nia husu ba Governu liuliu Ministériu Saúde hodi bele rezolve preokupa populasaun sira nian iha area remota sira ne’ebé susar tebes atu asesu ba fasilita saúde no seluk tan.
“Agora ne'e la’ós fóin dala ida de'it iha Urahou dala-tolu ona, komunidade sira mak ense rasik mina ba ambulansia hodi bele tula sira ba sentru saúde hodi halo tratamentu,” Nia hatuir.
Nia haktuir, durante fiskalizasaun iha munisípiu sira preokupa mak kona-ba problema saúde no realidade situasaun ida ne’e mak sempre hasoru iha terenu.
“Ida ne'e mak realidade ne’ebé ami hetan iha terrenu, tanba ne'e husu ba governu liuliu Ministériu saude, hodi bele fó atensaun ba problema ida ne'e, osan ida kada tinan tau ne'e, atu atende problema ne'e ka lae?, Mina de'it laiha, ninia problema ne'e iha ne’ebé,” Nia relata.
Tuir nia, situasaun ida ne’e mós akontese iha loron 27 fulan Maiu tinan ne’e ba profesór ida ne’ebé hetan atakasaun kardiaku bainhira hala’o hela prosesu aprendizajen, sira kontaktu ba ambulansia la konsege transporta, tanba laiha kombustivel, entaun sira uza transporte privadu mak lori profesór halo tratamentu iha Gleno, Munisípiu Ermera.
“Problema ida-ne'e mak agora daudaun akontese iha Sentru saúde sira, iha munisipiu Ermera, liu-liu iha Sentru saúde, munisipiu Ermera mós hanesan jerador ida iha ne’ebá la funsiona, kuandu kalan ahi mate pasiente sira, iha emerjénsia ne'e susar tebes dala-ruma balun atu mate tan,” Nia afirma.
Hatán ba preokupa ne’e, Vise Ministru Asuntu Parlamentár, Adérito Hugo da Costa hatete, menus ambulánsia no kombustivel sei envia ba Ministériu saúde hodi fó resposta klean liu ba deputadu sira sira preokupasaun.
“Kona-ba menus ambulánsia no kombustivel iha postu saúde sei emvia ba ministériu saúde hodi fó resposta ne’ebé klaru liu ba deputadu sira,” Nia informa.
