Loron ualo, fulan-Marsu kada tinan, mundu tomak selebra loron internasiona feto, tan ne’e iha tinan 2024 tema mundial ba komemorasaun loron feto mak “investe iha feto aselera progresu”.
Asaun ne’ebé FOKUPERS realiza ne’e iha fatin tolu hanesan, iha rotunda Prezidente Nicolao Lobato Komoro, rotunda Fransisco Xavier Amaral Merkadu Lama no Merkadu Bekora to’o Terminal Bekora.
Vise-Diretóra FOKUPERS, Domingas Afonso Amaral, iha selebrasaun loron mundial feto FOKUPERS hala’o asaun pasífika ba mudansa liu husi fahe aifunan ba komunidade sira no ema hotu iha teritoriu timor-leste.
“iha selebrasaun loron mundiál ba ohin loron, FOKUPERS hala’o ninia asaun ba mudansa liu husi fahe aifunan ba komunidade liu husi ema hotu-hotu, iha Timor laran atu sira mós bele selebra loron ida ohin, ho ami-nia mensajem xave ne’ebé ami fahe iha momentu ne’e hamutuk ho ai-funan sira mak ivenste ba iha edukasaun no ekonomia ba feto aselera progresu,” dehan Vise-Diretóra iha Resintu FOKUPERS Faról, Sesta (08/03).
Iha biban ne’e, FOKUPERS hato’o parabens ba feto iha mundu tomak, liliu ba feto Timor-Leste.
Tuir observasaun Jornalista INDEPENDENTE nian iha terenu nota katak, atividade asaun pasifika ne’ebé FOKUPERS realiza, aleinde ba komunidade sira, ba mós estudante sira iha kapital Díli.
