Objetivo husi sosializasaun ne’e, atu hasa’e koñesimentu pesoál sira Relasaun Públiku ka Ofisial Mídia nian kona-ba Lei Komunikasaun Sosiál nomós oinsá atu asegura direitu personalidade titular órgaun ninian no oinsa ezerse nia direitu perante publikasaun mídia nian.

Prezidente Konsellu Imprensa, Otélio Ote, hatete, atividade sosializasaun ne’e atu esplika klean kona ba lei meius komunikasaun sosial jeral no mós espesial kona ba regulamentu direitu resposta no retifikasaun, hodi hametin relasaun entre ofisial media sira ho konsellu imprensa no mos jornalista sira.

Nia dehan, ofisiál media labele ameasa jornalista, bainhira akontese problema sira kona ba konteudu jornalismu, maibé tenki rezolve liu husi prosesu regulamentu direitu resposta no retifikasaun.

“ita hotu-hotu buka ba problema sira ne’ebé mak konaba konteudu jornalizmu, ita rezolve liu husi direitu resposta no direitu retifikasaun,” dehan Prezidente, iha Salaun KI Kintal-boot, Kinta (07/03).

Enkuantu , atividade sosializasaun ne’e partisipa husi ofisial média sira no protokolu husi liña ministerial sira, no entidades administrativa indireta sira. No aktividade sosializasaun ne’e, sei hala’o durante loron tolu.