Nia dehan, situasaun ida ne’e, ADTL konsidera númeru ema ho defisiénsia psiko-sosiál iha Dili aumenta ba bebeik.
“Tuir dadus ne’ebé PRADET hato’o mai iha ADTL katak, purvolta ema ho problema psiko-sosiál na’in 90 resin, konsidera moris iha dalan ninin, tanba PRADET kada loron halo akompañamentu ba ema ho problema psiko-sosiál iha dalan ninin. Husi númeru na’in 90 resin ne’e, iha Kapital Dili de’it,”dehan nia ba Online INDEPENDENTE iha knar fatin Maskarenhas, Balide, Dili (07/03/24).
Ezekutivu ne’e hatutan, kazu ema ho moras saúde mental ka ema ho defisiénsia psiko-sosiál, kazu ida ne’ebé la’ós subar, maibé ema hotu hatene.
Tanba, tuir ADTL nia akompañamentu, kazu sira ne’ebé ema ho defisiénsia psiko-sosiál sira enfrenta, mak hanesan iha fulan-janeiru, akontesimentu ne’ebé akontese, ema ho defisiénsia mental mak sai vitima no seluk ema ho defisiénsia psiko-sosiál mak sai autor ba violensia fiziku hasoru sidadaun balun.
Nune’e mós, ema ho problema psiko-sosiál ne’ebé iha dalan ninin, barak mak hetan torturasaun no violensia, maibé laiha ida mak responsabiliza.
Ho situasaun ida ne’e mak, ADTL husu ba Governu liu husi Ministeriu Solidariedade Sosial no Inkluzaun no Ministeriu Saúde atu hamutuk buka alternativa hodi solusiona asuntu saúde mental iha Timor-Leste.
“Tanba ne’e mak presiza tebes Ministeriu Solidariedade Sosial no Inkluzaun nia atensaun ba situasaun real ne’ebé akontese,”tenik nia.
Enkuantu, tuir dadus sensus 2015, ema ho defisiénsia psiko-sosiál iha teritoriu laran tomak hamutuk na’in rihun tolu resin.
Entretantu, molok ne’e, Ministra Solidariedade Sosial no Inkluzaun (MSSI), Verónica das Dores hatete, to’o agora nia parte seidauk hetan ema ho defisiensia psikolojia ka ho moras mental iha dalan ninin.
“Kona ba ida agora, ita ohin hatete katak, balun toba iha Estrada, maibé neste momentu, ha’u seidauk hetan se mak toba iha estrada,”dehan Ministra hafoin remata enkontru ho Vise-Primeiru Ministru iha Palasiu Governu,Tersa (05/03).
Ministra afirma, ema defisiensia mental balun iha duni maibé tenke hein tanba presiza lori tempu atu rezolve no presiza ospitál atu atribui espesial ba sira. Tanba iha fatin rehabilitasaun maibé labele akumula hotu ema moras saúde mental.
