Papa Francisco ne’ebé konesidu ho ninia simplesidade no umanidade, kontinua hatudu Nia amigavel no domin ba sarani sira ne’ebé hein ho antusiazmu.

Maske hala’o ona viajen ne’ebé naruk no hakolen isin, maibe kontinua hatudu nia oin-midar hodi kaer liman ho pesoal aviasaun sira iha Aeroportu bainhira nia tuun husi aviaun Air Nugini.

Iha paisajen diferente ida iha serimonia simu Amu Papa iha Aeroportu. Uniforme husi membru Falintil Forsa Defeza Timor-Leste ne’ebé hamriik iha lina oin hodi simu Amu Papa konsege sita atensaun.

Membru F-FDTL hirak ne’ebé bolu Guarda Onra ne’e uza uniforme kor mean. Uniforme ne’e foin uza iha serimonia simu Amu Papa.

Prezensa Guarda Onra laos buat foun, baibain bainhira simu bainaka, hanesan mos ho nasaun sira seluk, Guarda Onra sempre hamriik iha lina oin. Maibe baibain uniforme ne’ebé Guarda Onra husi F-FDTL uza mak uniforme F-FDTL nian.

Maibe iha vizita Amu Papa, iha mudansa ba uniforme ne’ebé uza. Faru kor mean ho kalsa kor metan ho riska kor matak, azul no mutin iha sorin-sorin, no xapeu kor metan.

Kor husi faru, kalsa no xapeu ne’e reprezenta bandeira Republika Demokratika Timor-Leste no riska iha kalsa reprezenta bandeira F-FDTL.

Entertantu, hafoin serimonia simu Amu Papa iha Aeroportu remata, Amu Papa sai husi Aeroportu ho kareta kor mutin ba Nunciatura.

Sarani lubuk boot Ida ne’ebé hahu husi dader hein ona Amu Papa husi rotunda Komoro to’o Motael simu ho antusiazmu no hakilar ‘Viva Papa’.

Tuir orariu, Amu Papa sei hala’o enkontru ho entidade estadu no Governu Timor-Leste iha Palasiu Prezidensia Nicolau Lobato, Bairo Pite.