"Prezensa Sua Santidade Papa Francisco bele muda mentalidade kada ema nian, tanba dala ruma hanoin ne'ebé la hanesan tanba de'it diferente relijiaun tanba ne'e ho prezensa Papa ne'e dada ita-nia hanoin sai ida de'it hodi lori dezenvolvimentu ba futuru ne'ebé di'ak no prósperu," nia dehan iha Comoro, segunda (09/09).
Nia hatutan, mezmu relijiaun rasa, kór, no kultura la hanesan maibé fiar katak ho Papa nia prezensa bele hamutuk hodi lori rai ne'e ba oin.
"Maibé ita presiza iha buat rua mak, dahuluk ita tenke fiar no hakru’uk ba Maromak depois Estadu, ida-ne'e importante nu'udar kristaun protestante hala'o iha moris loro-loron nian," nia hatutan.
Tanba nu'udar sidadaun Timoroan sente onradu no Papa mai ne'e ba ema Timoroan hotu.
"Ha'u nu'udar sidadaun Timoroan ida no ha'u sarani protestante sente kontente bele mai simu Papa Francisco. Maske diferente relijiaun maibé atu dehan relijiaun ne'e fatin ne'ebé akumula ema, maibé ita-nia fiar hotu-hotu ba Maromak no dalan mak la hanesan ", konklui.
Peregrinu kristaun Protestante hosi Igreja Evanjélika Assembleia de Deus Ataúru hamutuk 35.
