Nune’e, familia matebian José Bernardo husu ba PNTL atu hatudu kamera videovijilansia, atu bele hatene kauza lolos husi akontesementu ne’e, tanba familia sira deskonfia katak, sira nia alin ne’e mate laos tara-aan.
"Ami familia no juventude audian afirma no insiste katak, husu ba Komando PNTL Munisipiu Dili, atu fó sai justisa sertaza lolos ba ami familia no juventude sira katak, los duni ka lae?, ami nia alin José Bernardo ne'e mate tanba tara-an no se ami nia alin ne'e mate tanba tara-an, ami familia ezizi atu loke kamera CCTV atu hatudu faktus klaru ba ami nia alin nia mate," dehan Portavos José Agustino da Costa, liu husi Konferensia Imprensa iha Residensia, Audian, sabadu ne'e (03/09).
Portavoz ne’e hatutan, familia no juventude sira sente sokadu triste tebes ba matebian nia mate, tanba deskonfia katak ho tara-an iha sela komando Polisia Kaikoli,
"Ami familia sente triste tebes, bainhira rona alin mate ona, tanba deskonfia katak tara-an ne'e, ami familia no juventude Audian konsidera lalos, imposivel ami nia alin bele tara-an, serake polisia ne'ebe halo pikete iha loron ne'e ba tiha iha ne'ebe, mak ami nia alin ne'e bele tara-an to'o mate," nia dehan.
Tanba ne'e, familia husu Komando PNTL Munisipiu Dili, atu investiga husi Membru PNTL to'o Komando ne'ebé hala'o servisu iha loron ne'ebe matebian mate,
"Karik tuir duni Polisia sira dehan katak, kamera CCTV avaria, ami familia no juventude Audian deskonfia bo'ot ba polisia sira, karik sira mak baku mate ami nia alin,"Portavoz ne’e informa.
Nune’e, familia no juventude husu justisa ne'ebé tranparensia lolos ba José nia mate.
Aleinde ne'e, familia mos husu ba Governu no Parlamentu Nasional (PN), atu hatuur lolos regulamentu no lei hodi regula membru PNTL no se de’it, bainhira halo kaptura ba sidadaun sira lori ba sela husu atu labele halo torturasaun iha sela detensaun, atu nune'e hodi evita kazu hanesan ne’e.
Enkuantu, rezultadu autopsia husi parte saúde seidauk fó sai ba familia matebian, tanba familia hein hela rezultadu autopsia.
"Ami familia hein rezultadu husi autopsia no mós prosesu justisa la'o ona, maibé ami sei hein husi justisa nian, maibé ami sei esforsu no tenta nafatin hodi buka lia los," tenik Portavos.
Portavos ne'e mós dehan, bainhira simu rezultadu autopsia husi parte saúde, sei fó sai ba iha publiku tomak, atu nune'e ba oin kazu labele akontese tan, no hotu ona iha matebian refere.
Enkuantu, familia matebian konta tuir katak, tuir kronologia iha loron 1 fulan-Setembru, membru PNTL na'in haat (4), halo kapturasaun ba matebian José iha rezidensia Audian, mais-menus iha tuku 12:00 meudia, hodi ba hatama iha sela detensaun PNTL-Kaikoli, hanesan suspeitu ba konfrontu ida iha Audian.
Bainhira iha kapturasaun, memrbu PNTL sei hato'o ba familia katak, tau konfiansa ba Polisia sei fó seguransa no protesaun ba José Bernardo nia vida bainhira iha Polisia nia liman.
Hafoin ne'e, Membru PNTL hirak ne'e, lori José Bernardo ba halo prosesu investigasaun hodi detein iha sela Polisia Kaikoli, maibé iha tuku 7:20 kalan, familia desidi ba vizita, iha Edifisiu Komando PNTL Kaikoli, derepente familia hakfodak, tanba haree ambulansia para iha edifisu Komando, nune’e dehan José tara-aan iha sela, maibé parte PNTL la informa uluk ba familia.
Entretantu, dadaun ne'e matebian José Bernado iha hela nia rezindensia Audian no familia hein hela rezultadu otopsia, hafoin bele haloot matebian nia isin mate.
Molok ne'e, PSIK rekolla kamara CCTV iha Komandu PNTL Dili.
Iha parte seluk Polisia Sientifika Investigasaun Kriminál (PSIK), iha loron 02/09 hahú rekolla evidensia hanesan kamara Closed Circuit Television (CCTV) iha Komandu Munisipiu Dili liga ba kazu sidadaun JBJS neebé tara aan iha sela detensaun Komadu PNTL Munisipiu Dili nian.
Polisia Sientifika Investigasaun Kriminál (PSIL), hahú rekolla evidensia hanesan kamara Closed Circuit Television (CCTV) iha Komandu Munisipiu Dili iha loron 02/09 tuku 02:00 loraik no remata iha tuku 03:30
Tuir observasaun Jornal INDEPENDENTE komandu PNTL Munisipiu Dili nota katak, ekipa investigadór sira lori kedas CCTV falun ho suratahan boot hodi tula ba kareta, transporta kedas iha edifisiu PSIK, atu asegura hodi sustenta ba iha prosesu investigasaun.
Tuir informasaun ne’ebé Jornal INDEPENDENTE asesu iha terenu katak, CCTV sira ne’ebé mak antes monta iha edifisiu komandu PNTL Dili inklui iha sela detensaun Komandu Dili rasik avaria kleur ona no PNTL munisipiu Dili laiha osan atu halo manutensaun, tanba osan ne’ebé prevé ba iha komandu PNTL Dili, la sufusiente atu kobre ba halo manutensaun CCTV.
