Prezidente Komisaun Serimonia Resesaun no Misa Agradesimentu Kardeál, Padre Guilhermino da Silva hateten, komisaun iha Timor husu Prezidente Parlamentu Nasionál atu partisipa serimonia ne'ebé prepara ona.
"Ami hasoru Prezidente Parlamentu Nasionál, Aniceto Guterres, hodi konvida atu partisipa iha serimonia resesaun no misa agradesimentu ne'ebé hala'o iha Aeroportu Nicolau Lobato no Tasi-tolu," dehan nia, iha Parlamentu Nasionál, horisehik.
Pe. Guilhermino hateten, peparasaun komisaun nian ba eventu resesaun no misa agradesimentu kuaze 80% no konvidadu maioria husi parte igreja nian, liuliu bispu sira iha nasaun viziñu hanesan, Darwin, Atambua no Kupang.
"Ami hein sira-nia konfirmasaun. To'o ohin bele hatene serteza katak sira bele mai, maibe pesaolmente fiar katak, mezmu bispu sira la marka prezensa tanba servisu mas reprezentante konserteza sei mai hodi partisipa iha eventu ne'e, maibé ami nafatin hein sira-nia konfirmasaun," tenik nia.
Nia hatutan, komisaun konjunta iha mós komisaun ne'ebé forma husi episkopál timorense forma husi dioseze tolu (3) hodi konvida sarani hotu atu partisipa serimonia kardeál dahuluk nian, iha Tersa (5/9), iha Aeroportu Internasionál Nicolau Lobato no Kuarta (6/9), iha Tasi-Tolu.
Serimonia ne'e la'ós ba Arkedioseze Dili de'it, maibé onra ba povu Timor no Igreja Timor-Leste, tanba primeira-vés iha Timor-Leste depois tinan 500 Kristu tama Timor, foin Vatikanu liuhusi Amu Papa Francisco hili no nomeia kardeál primeiru husi Timor, tanba ne'e misa agradesimentu ne'e kardeál mak sei prezide.
Iha fatin hanesan, Ministru Admistrasaun Estatal, Miguel Pereira de Carvalho hateten, governu deside halo desizaun atu hola parte husi komisaun organizadora atu hamutuk ho reprezentante husi ministériu sira hotu hola parte.
Maibe governu nian pozisaun durante fulan-tolu servisu hamutuk ho episkopál timorense hodi halo perparativu sira atu bele halo serímonia resesaun ba kardeál ne'e ho didi'ak.
Entaun, durante ne'e governu disponibiliza ni meiu sira hotu tantu rekursu umanu, patrimoniál no mós rekursu finanseriu atu bele apoia komisaun organzidora konjunta ne'e odi bele halo perparativu sira bele sai di'ak.
