Tuir Sekretariu Estadu Protesaun Sivil (SEPS), Joaquim dos Reis Gusmão Martins hatete, apoiu úmaniatria ne’e ba vitima sira ne’ebé afeitadu husi inundasaun, hodi hakman sira nia sofrementu ne’ebé infrenta hela.
“Ita konsentra iha Suku Kampung Alor hodi fahe apoiu úmanitaria, tanba iha Suku ne’e kompostu husi Aldeia tolu 01, 02 no 03, no tuir dadus ne'ebé Autoridade lokal sira rekolla hamutuk 1,362 familia afetadu,”dehan nia iha Suku Kampung Alor (12/05).
Tanba ne’e iha loron horseik (11/05) ekipa sira distribui ona ba Aldeia 01 no 02 hamutuk 494, nune’e ohin kontinua distribui ba Aldeia 03 hamutuk 847 familia afetadu.
Entretantu, Xefe Suku Kampung Alor, Alcina Carvalho dos Santos hatete, apoiu úmanitaria ne'e realiza bazeia ba inundasaun ne'ebé akontese iha fulan-abril tinan ne'e.
Nune’e, nia agradese ba Governu, mesmo tarde maibé nafatin iha vontade apoiu nia populasaun sira atu labele senti hamlaha.
Molok ne’e Sekretaria Estadu Proresaun Sivil (SEPS) ho nia ekipa sira apoiu ona aihan no sasan uma laran nian ba vitima inundasaun sira iha Kapital Dili hanesan, Aldeia Maslidun, Lahane, Komoro,Hera, Metinaro, Ataúro no iha postu sira hanesan, Laklubar, Laklo, Oekuse no Vikeke.
Asisten Editor: Saturnina da Costa
