Kordenadór Forsa-Tarefa ba Prevensaun no Mitigasaun Surtu Covid-19 iha Timor-Leste, Rui Maria de Araújo hatete, husi kazu ohin iha mane na’in 78 no feto na’in 62.
“Husi totál kazu detetadu foun ohin, ema ne’ebé ho idade 12 mai kraik iha na’in 2, idade entre 12-59 iha na’in 135, idade 60 ba leten hamutuk na’in 3,”dehan nia liu husi komunikadu imprensa (11/05).
Ho nune’e, totál kazu detetadu foun ohin, proporsaun kazu sintomátiku hamutuk 15,7%.
Komulativu kazu konfirmadu sura husi loron 21 fulan-marsu tinan 2020 to’o loron 11 fulan- maiu tinan 2021 hamutuk 3,493.
Nune’e dadus jeral ba loron ohin iha kazu foun na’in 140, kazu rekuperadu na’in 1 no kazu ativu iha sala Izolamentu hamutuk 1,723.
Husi horiseik (10/05) mai ohin (11/05) teste PCR ne'ebé Laboratóriu Nasionál Saúde halo iha Dili hamutuk 1.214, kompostu husi Vijilánsia sentinela iha na’in 34, Rastreiu ba kontaktu (Contact tracing) na’in 130, Rastreiu Aleatoriu (Random Screening) na’in 462, Viájen sai husi serka sanitária husi Dili hamutuk 541, Viájen internasionál laiha no Follow up iha kuarentena iha na’in 37.
Total testes PCR ne’ebé halo iha loron horseik (11/05) iha munisípiu sira seluk no RAEOA, inklui Óspital Nasiónal Gúidu Valadares (HNGV) hamutuk 653 kompostu husi, RAEOA iha 20, Maubisse iha 171, Suai iha 142, Maliana 17, Baucau iha na’in 155, Vikeke na’in 62 no HNGV hamutuk na’in 86.
Entretantu, ohin loron (11/05) Izolamentu Vera Cruz halo tratamentu ba kazu detetadu na'in 32 fahe ba Obstetrisia na’in 12, Medisina interna na’in 18, Neonatolojia na’in 2.
Na'in 12 iha obstetrisia kategoria moderadu hotu, sira-nia kondisun estável, sira na'in 18 iha medisina interna, 1 grave uza oksijéniu, 17 moderadu no kazu 2 neonatolojia moderadu hotu.
Asistente Editor: Saturnina da Costa
