Tuir Minístru Prezidénsia Konsellu Minístru Fidelis Leíte Magalhãens hatete, hafoin analíza aprezentasaun husi koordenadór Sentru Integradu ba Jestaun Krize (SIJK), kona-ba pontu situasaun epidemiolójika iha Timor-Leste nian, nune’e Konsellu Minístru deside mantein impozisaun serka sanitaria no konfinamentu domisiliariu jéral iha Dili.

“Konsellu Ministrus aprova ona projetu sira Rezolusaun Governu nian ne’ebé mantein impozisaun serka sanitária iha Munisípiu sira Baucau, Covalima no Dili ba loron sanulu resin haat (14) tan,”dehan nia iha konferensia imprensa iha Minísteriu Finansas, Aitarak-Laran Dili, kuarta ne’e (12/05).

Nune’e, kontinua bandu sirkulasaun ema entre husi munisípiu Baucau, Covalima no Dili no mós sirkunskrisaun administrativa sira-seluk, exetu iha kazu hirak ne’ebé nia fundamentu forte hanesan, ho razaun seguransa públika, saúde públika, asisténsia umanitária, manutensaun husi sistema sira abastesimentu públiku, ka razaun seluk ne’ebé presiza atu hala’o ba interese públiku nian.

Molok ne’e Governu extende serka sanitária iha Munisípiu Dili, Baucau no Covalima hahú iha oras 00:00 loron 2 fulan-maio no sei termina iha oras 23:59 loron 16 fulan-maio.

Entretantu, iha Munisípiu Dili mantein impozisaun konfinamentu obrigatóriu ba loron sanulu resin haat (14) tan no konfinamentu domisiliáriu jerál ba ema hotu-hotu ne’ebé oras ne’e daudaun iha hela Munisípiu Dili, exetu husi razaun sira ne’ebé anteriormente define ona, liuliu ho razaun seguransa públika, servisu ba asesu beins no servisu sira nesesidade dahuluk nian.

Enkuantu ba Munisipiu Ainaru, Ermera, Lautem, Likisá, Manufahi no Vikeke, Governu deside la renova ona impozisaun serka sanitária no sei vigor to’o loron 16 fulan-maio.

Asistente Editor:  Saturnina da Costa