"Ha’u dehan ona publiku tenke rona lai, tanba agora ne'e demokrasia ema hotu koalia hakarak hatun malu, agora rona de’it seidauk iha desizaun, ema ida hanesan Xanana nunka hanoin atu entrega fali rai Naktuka ba Indonezia, ne'e la lojika," katak nia.

Molok ne’e, Primeiru Ministru, Kay Rala Xanana Gusmão esplika kona-ba razaun tanba sa mak governu Timor-Leste ho Repúblika Indonezia seidauk asina akordu fronteira rai-maran entre nasaun rua ne’e.

"Imi mós kala hanoin kona-ba fronteira, kona-ba fronteira dehan atu mai asina nusa mak la saida. Sim, ita atu dehan karik ita hakarak buat ne'e bele lalais mais ita la'os ansi liu, taka-matan ba be, ne'ebé buat ne'e lori tempu," dehan PM Xanana iha intervista ho media nasionál, iha otel Indonesia Kempinski Jakarta, Sesta (26/10).

Tuir Xefe Governu ne'e molok asina, prosesu hotu tenke iha konkordansia ba malu.

"Ne'ebé ita hakarak lalais mais ita hanesan ne'e duni, kuandu buat ida ita atu to'o akordu ne'e iha bu'at hotu ita konkorda malu ona mak ita foin (asina).”

"Prezidente (Jokowi) dehan futuru prosimu, se bele karik lalikan kleur demais ba ita haree took asina tiha, ne'e duni mak ohin dehan la'os taka dalan ba buat sira ne'e hotu, mais ita mós hodi hatudu katak ita mós ho ita-nia prinsípiu, Indonézia mós iha nia prinsípiu."

“Respeitu malu prinsípiu sira ne'e hodi bainhira asina buat ruma ka dokumentu ruma, buat ne'e parte rua hotu bele halo la dehan bele manán, mais bele mós benefisia husi ne'e,” dehan PM Xanana.