Nia dehan, Governu presiza apoiu fasilidade no fó prioridade ba iha rekursu umanu atu nune’e autoridade nasionál ne’e bele halo nia funsaun ho adekuandu, tanba Timor-Leste nasaun ida ne’ebé iha nia tasi no rai maran, presiza halo kontrolu ne’ebé di’ak ba iha tasi, atu nune’e bele preve krimi transnasionál, droga no atividade ilisitu sira ne’ebé tenta amaesa tasi Timor-Leste.
“Ita nian Governu presiza dezenvolve Autoridade Maritima ne’ebé iha ona, ita presiza tau fasilidade ne’ebé adekuandu atu autoridade ida ne’e bele halo nia funsaun ho di’ak,” Dehan Falur iha nia intervensaun, iha ambitu selebrasaun ezistensia Komponente Naval ba dala 22 iha Baze Naval Hera (12/01).
Nia informa, atu dezenvolve Autoridade Nasional Maritima ne’e presiza iha asaun koletivu ne’ebé mak define ona iha valór sistema autoridade martima.
Iha fatin hanesan, Komandante Komponente Navál Komodoro Higinio da Costa, hateten, Autoridade Maritima Nasionál estabelese husi VIII Governu konstitusionál iha 2023, ne’ebé envolve ministeriu balun inklui Komponente Navál ho objetivu atu asegura riku soin iha tasi-laran.
“Maibe atu dezenvolve Autoridade Maritima Nasionál Maritima ne’e presiza ita hotu no lideransa nasionál hotu nian konsensu,” dehan nia.
Nia afirma, Governu anterior halo realizasaun lubuk ida aumenta kapasidade forsa armada no husu ba Governu ida ne’e atu kontinua apoiu fasilidade no formasaun ba militár Komponente Navál hodi ba oin asegura riku soin iha tasi Timor.
“Fiar katak Governu dasia sei bele hatutan moderniza no kapasita forsa armada liu liu Komponente Navál atu nune’e Navál bele dezenvolve di’ak liu hodi asegura tasi timor, tanba meus atu dezenvolve ekonómia depende ba kapasidade atu garante seguransa maritime,”afirma nia.
Nia hatuir desde iha tinan 2002 forsa defeza Timor-Leste hetan ró rua husi Governu Xina no ró rua husi nasaun parseiru, maibé ró hirak ne’e hanesan Jaco no Betano avaria desde iha 2016 to’o agora seidauk iha manutensaun tanba problema finanseiru, ida ne’e difikulta servisu Komponente Navál no Autoridade Maritima Nasionál.
Maske hasoru difikuldade, nune’e Komandante Higinio Governu liu husi parseiru Austrália no Sigapura iha 2023, fó ona apoiu hodi instála ekipamentu sistema kontrolu ba aktividade peska illegal iha tasi Timor durante oras 24.
“Maibé ita laiha ekipamentu ne’ebé mak bele apoiu liu tán ita halo kontrolu ba iha tasi laran,” afirma nia.
Alende ne’e Komandante Komponente Navál ne’e mós informa, iha 2024 sei estabese tán postu Komponente Navál rua tán iha Oe-cuse no rua iha Valusere Tutuala atu halo kontrolu ba iha peska ilegál.
“Iha 2014 Komponente Navál hahú estabese postu forsa Navál iha Oecuse no Ataúro no iha 2020 ita estabese ona postu Komponente Navál iha Betano iha tinan, 2024 ita sei instála tan komponente Naval rua tán iha Oe-kusse no rua iha Valusere Tuatuala tanba fatin sira ne’e mak iha aktividade ilegál barak,” hakotu nia.
