“Agora ne’e ami halo reestruturasaun ka halo kolokasaun nomeasaun foun. Instituisaun F-FDTL ne’e iha komponente haat hanesan Komponente Apoiu Servisu (KAS), Komponente Formasaun no Treinu (KFT) Komponente Terrestre (KT) no Komponente Navál (KN),” dehan nia, iha Palásiu Prezidensiál Bairru-Pité, horisehik.

Lere esplika, komandu foun sira ne’ebé atu substitui komandante sesante sira mak hanesan, Komponente Apoiu Servisu (KAS), Tenente Koronel Armindo Nunes dos Santos substitui Tenente Koronél Benedito Dias Quintas ‘Punu-Fanu’, Komponente Formasaun no Treinu, Tenente Koronél Cesário Ximenes Belo ‘Haksolok’ substitui Tenente Koronél Celestino Pinto, Komponente Terrestre, Tenente Koronél Renilde Corte-Real da Silva substitui Tenente Koronél Marcelino Ximenes ‘Rijai’ no Komponente Navál, kapitaun João Silva substitui Kapitaun Fragata Adão Brito.

Tuir estatutu F-FDTL nian, atu sai komandante komponente sira tinan rua de’it, maibé haree ba tempu ne’e la sufisiente, agora fleksibilidade iha komandu nia laran bele másimu tinan tolu.

Nune’e, Xefe Estadu iha kompeténsia atu nomeia no ezonera komandante komponente sira hafoin naran sira ne’e publika ona iha Jornál Repúblika. Nune’e, sei laiha pose husi Xefe Estadu tanba pose husi Prezidente Repúblika ba de’it Xefe Estadu Maiór no ninia Vise-Xefe Estadu Maiór sira.

“Ha’u se lae Vise-Xefe Estadu Maiór bele ba iha komponente sira hodi halo pasajen komandu,” dehan nia.

Lere dehan, Reestruturasaun ne’e akontese la’ós katak komandante sesante sira la susesu iha sira-nia lideransa, maibé haree ba própriu estatutu atu halo rotatividade ba komandu komponente sira.

Komandante na’in haat ne’ebé hetan ezonerasaun ne’e komandu sei koloka sira ba fali iha parte, finansas, operasaun, inspetoria no servisu sira seluk.