Tuir oráriu normál resesu loloos hahú sei halo iha 15 Jullu to’o 14 Setembru, maibé mudansa foun ne’ebé PN sei halo maka resesu sei halo iha 15 Agostu to’o 14 Setembru.

Projetu Deliberasaun ne'ebé hato’o prolongamentu períodu normál hetan rezultadu votasaun afavor 36 kontra 18 abstensaun laiha.

Proponente Projetu Deliberasaun, Deputadu Patrocínio Fernandes dos Reis hateten, iha projetu ne’e deskreve momoos razaun sira tanba iha artigu 45 rejimentu PN kolia kona-ba sesaun lejizlativa.

“Konsidera ba pedidu sira ne'ebé mai husi governu hodi haree ba asuntu ne'ebé importante ba interese nasionál ninian, ne'ebé presiza duni atu PN tenke prolonga tan ninia funsionamentu norma”, dehan nia, iha Plenária PN, horisehik.

Tuir nia, iha servisu barak ne’ebé presiza deputadu sira halo hanesan alterasaun lei balun ne’ebé atu apoia ba ratifikasaun tratadu Fronteira Marítima nian.

Iha fatin hanesan, Deputadu Bankada FRETILIN, Fabião de Oliveira hateten, sira-nia bankada vota kontra prolongamentu funsionamentu PN tanba seidauk iha oráriu fiksu kona-ba debate tratadu FM nian.

“Interese nasionál la’ós ami lakohi partisipa maibé ami hakarak planu feitu ba data determinasaun”, dehan nia.

Ne’e duni, tenke iha fulan ida ne’e nia-laran tenke determina data ho loron klaru hodi bele hatene.