Provedór Direitus Humanus no Justisa (PDHJ), Virgílio Guterres “LAMUKAN” hatete, iha dezenvolvimentu institusionál ninia alokasaun orsamentu ba PDHJ iha tinan 2024 ho montante $2,061,391.00.
“Taxa ezekusaun too iha 27 Marsu tinan 2024 ne’e atinje ona 12,2%, atuál ne’e $301,988.08, obrigasaun ne’e $10,963.12, ida ne’ebé sai hanesan komitmentu ba komprimisiu ne’e $59,186.12” dehan Provedór iha Sala Biblioteka PDHJ Kaikoli, Kinta (24/04).
Nia dehan, PDHJ mós rekruta ona pesoál lubuk ida ba média profisional ninian ne’ebé atu ba servisu iha Tekniku informasaun (IT), ba kreator audivizuál.
“Tanba kampaña promosaun direitus humanus ona ita hotu hatene katak, agora iha era dijitál utiliza kanál sira ne’ebé iha, hodi promove direitus humanus tanba ne’e presiza ema ne’e no iha fulan-Maiu sira hahú ona servisu,” Provedór hatutan.
Eis Prezidente Konsellu Imprensa (KI) ne’e afirma, PDHJ dadaun ne’e, prepara hela relatóriu despeza ba Tribunal das Kontas, tanba lei haruka katak entidade públiku hotu-hotu banhira remata fulan-Maiu tenki hatama ona relatóriu despeza kada trimestrál ba Tribunal das Kontas no Parlamentu Nasionál (PN).
Nune’e PDHJ nia peparasaun ba reletoriu primeiru trimestre dadaun ne’e atinje ona pursentu 30 (30%).
Enkuantu, ezekusaun orsamenu ne’e PDHJ ezekuta ona programa, Edukasaun Promosaun ba Direitus Umanu no Boa Governasaun, Monitorizasaun no seluk tan.