Iha Dili foos Kilograma 25 besik ona $20 Featured

By Ekipa INDEPENDENTE Abril 26, 2024 2938
Foos Folsom. Foto: Google. Foos Folsom. Foto: Google.

DILI: Foos nia folin iha merkadu kontinua sa’e. Iha fulan Abril nia rohan foos kilograma 25 nia folin besik ona $20 kada saku. Enkuantu ba kilograma 20 folin ne’ebé as liu mak $17.

Tuir dadus ne’ebé Jornalista INDEPENDENTE rekoila iha loza sira iha kapital Dili, iha 24 Abril, horseik, foos nia folin variante depende ba kuantidade no marka husi foos refere.

Foos ho kilograma 20 ho folin baratu liu mak $13.75 no folin aas liu mak $17. Enkuantu folin ba 25 kilograma hahú husi $18 to’o $19.50.

Pesoal loza Lili Shop, Bárbara da Cunha informa, foos nia folin sa’e tanba sira sosa husi kompaña distributor sira mós ho folin ne’ebé sa’e.

“Ami sosa foos (25 kg) husi kompaña distributor sira ne’e ho folin $17.50, ami fa’an fali ho folin $18, ami manan sentavus lima-nolu ($0.50) de’it,” dehan Bárbara, iha nia knar-fatin, Kuarta (24/04).

Tuir nia, ho foos nia folin ne’ebé sa’e ne’e sosa-nain balun mai hato’o protesta no fó sala ba loza na’in, maibé sira esklarese katak foos nia folin mak sa’e duni, laos loza-nain mak inventa.

“Balun lamenta ho loza-nain, maibé ami dehan ba sira ‘ami sosa mai karun hanesan ne'e nanis tiha ona, entaun ami mós fa'an ho folin hanesan ne'e, ami la inventa folin,” dehan nia.

Iha fatin seluk, reprezentante Loza Mela Shop, Audian, Erlin Gomes informa foos ne'ebé sira faan ho tipu oioin no nia kilograma la hanesan, nune’e nia folin depende ba tipu no kilograma.

Iha loza ne’e, foos 20 kg ne’ebé baratu liu mak Amor da Familia ho folin $13.50, no folin ba 25 kg ne’ebé baratu liu mak Ikan Ema ho folin $16.50.

“Foos sira ne'e hatama husi kompañia tolu mak hanesan Perisos, Alfa no Kreatif. Ezemplu Foos Amor da Família 20 kilograma fa’an ba ami ho presu $13.25, entaun iha loza faan fali $13.50, kada saku hetan nia funan sentavus $0.25 to’o sentavus $0.50,” dehan Erlin.

Sosa-nain ida, Helena Guterres lamenta ho folin foos ne’ebé kontinua sa’e.

Helena husu atu governu halo lalais intervensaun ruma atu bele hatuun foos nia folin.

“Foos 25 kilograma ne’e ne’e ami sosa labele, ami-nia kbiit la to'o,” dehan nia.

Molok ne’e, Vise Primeiru Ministru, Ministru Assuntu Koordenadór Assuntu Ekonómia, no Ministru Turizmu no Ambiente, Francisco Kalbuadi Lay, konsidera foos nia folin iha kapital Dili tama iha kategoria normal.

Kalbuadi hato’o kestaun ne’e relasiona ho preokupasaun públiku kona-ba folin foos ne’ebé kontinua sa’e husi fulan ba fulan.

"Ita laiha krize ba foos, so ke ha'u haree ha'u-nia maluk sira, ha'u-nia alin sira gosta mak buka hatene dehan foos folin sa'e, mais iha Dili ne'ebé folin foos di'ak hela ita-booot sira nunka ko'alia,” dehan Kalbuadi ba Jornalista sira hafoin enkontru ho Prezidente Repúblika, José Ramos Horta, iha palasiu Prezidensia Bairu-pite, Sesta (12/04).

Maske nune’e, Kalbuadi rekoñese katak folin foos iha fatin balun sa’e duni tanba empreza balun kontinua halimar.

“Ami rekoñese katak ita la kontrolla to'o iha área rurál, maibé ha'u hatene katak MKI esforsu an tebes-tebes hamutuk ho SLN hodi interve iha fatin hotu-hotu atu garante foos folin normál," dehan Vise PM ne’e.

Tuir mai, lista foos nia folin ne’ebé fa’an iha loza balun iha Dili:

Loza Lili Shop, Delta 4:

  1. Beras Wangi 20kg ho folin $19.50
  2. Folsom 20kg ho folin $18. 75
  3. Manu Vitória 25kg ho folin $18
  4. Vasco da Gama 25kg ho folin $18
  5. Gostu Loos 25 kg ho folin $18
  6. Globus 25 kg ho folin $18
  7. Amor da família 20kg ho folin $17
  8. Nona Manis 20kg ho folin $15

Loza Mela Shop, Audian:

  1. Beras Wangi 5 kg ho folin $6,
  2. Beras Wangi 10 Kg ho folin $10.50
  3. Beras Wangi 15 kg ho folin $15
  4. Beras Wangi 20 kg ho folin $19.25
  5. Amor da Família 20 kg ho folin $13.50
  6. Foos Folsom 20 kg ho folin $ 19.00
  7. Lafaek 25 kg ho folin $18
  8. Globus 25 kg ho folin $17.50
  9. Tuna 25 kg ho folin $17
  10. Ikan Emas 25 kg ho folin $16.50

Loza 512 Weirongxinm, Bidau:

  1. Beras Wangi 5 kg ho folin $6.00
  2. Beras Wangi 15 kg ho folin $15.00
  3. Mei 5 kg ho folin $6
  4. Mei 15 kg ho folin $15.00
  5. Foos Morin 10 kg ho folin $10.25
  6. Foos Morin 20 kg ho folin $19
  7. Folsom 20 kg ho folin $19
  8. Makikit 20 kg ho folin $14.50
  9. Rajawali 20 kg ho folin $13.75
  10. Globus 25 kg ho folin $18
  11. Tuna 25 kg ho folin $17
  12. Nona Manis 20 kg ho folin $14.75
  13. Gostu Loos 25 kg ho folin $18.25
  14. Globus 25 kg ho folin $18
Rate this item
(0 votes)

Independente Digital TV