"Orsamentu ba tinan 2024 ne'e, ita sei aloka projetu konstrusaun foun eskola 21, ne'ebé ninia ezekusaun daudaun ne'e sei iha verifikasaun dadus hosi Ajénsia Dezenvolvimentu Nasionál (ADN). Ita hein katak semana oin verifikasaun previa hosi ADN ba dezeñu Planta no Kadernu Enkargu ka Bill of Quantity (BoQ) ne'e bele termina. Ida-ne'e ita konsidera prioridade," dehan nia iha knaar fatin, Villa-Verde, Kuarta (24/04).
Nia informa, eskola foun 21 ne'ebé ME sei konstrui iha tinan ne'e kompostu husi Pre-Eskolár 11, ensinu báziku sia (9), nível sekundáriu liuliu eskola ensinu sekundáriu tékniku vokasionál ida.
Konstrusaun eskola ensinu rekorrente, nia dehan, ministériu Edukasaun sei fó prioridade ba tinan oin (2025) tanba iha eskola balun ne'ebé konstrusaun ne'e hetan apoiu husi Korean Internationa Cooperation Agency (KOICA).
"Ensinu rekorrente ne'e ita sei tau ba tinan tuir mai. Tanba ensinu rekorrente iha edifísiu balun ne'ebé apoiu hosi KOICA ba konstrusaun sentru komunitáriu, ne'ebé la'o hela no hein tan planu sira tuir mai," nia hateten.
Ba projetu reabilitasaun tinan ne'e laiha tanba orsamentu 2024 aloka ba kapitál dezenvolvimentu ne'ebé ninia prosesu liuhusi aprovizionamentu ne'ebé la hanesan ona ho tinan anteriór, neʼebé atribui ba projetu komunitária ka kategória transferénsia públiku.
"Ita-nia osan ba projetu reabilitasaun ne'e purvolta rihun $2-resin. Agora osan ba tinan 2024, ba projetu hamutuk 23 ne'e prevee osan millaun $5. Hosi orsamentu ne'e, re-aloka ba re-apropriasaun ba pagamentu iha hela andamentu ka projetu tinan anteriór ne'ebé seidauk konsege konklui no projetu neʼebé nia pagamentu ita tau tinan agora. Ida-ne'e mós inklui pagamentu ba retensaun ne'ebé konklui ona iha tinan kotuk liubá ne'e," nia dehan.
Tanba ne'e, nia hateten, imposível governu atu rezolve infraestrutura eskolár iha tinan ida, maibé tanba ida-ne'e programa prioridade entaun sei rezolve fazeadamente.
"Tuir komprimisiu nian ne'ebé deskreve iha polítika mak infraestrutura sai prioridade, maibé ita sei kontinua halo nafatin infraestrutura sira iha mandatu Governu da-sia nian," nia hateten.
Entretantu, kona-ba projetu komunitária tinan kotuk ne'e iha hela andamentu hamutuk 116 ne'ebé seidauk konklui, tanba implementasaun projetu ne'e iha governu anteriór no nia kontratu ne'ebé la konsege halo, maibé foin realiza kontratu iha fulan- outubru 2023 no transferénsia orsamentu hodi realiza iha novembru.
Nia dehan, nia ezekusaun atraza to'o agora maibé nia pursentu atuál ba tinan 2023 ne'e foin atinje 31% hosi totál projetu iha territóriu ne'e hamutuk 116.
