Uma-kain 372 iha Tasi Tolu simu ona informasaun kona-ba eviksaun ne’e ba dala haat. Hahú iha fulan Maiu, Juñu, inisiu Jullu, no iha 11 Jullu ne’e, ekipa ida ba Tasi Tolu hodi fó tan avizu atu hamamuk fatin hahú husi 11 to’o 15 Jullu ne’e.
Ba kestaun ne’e, Diretór Jestaun Merkadu Munisípiu Dili, Artur Henriques informa, eviksaun ba komunidade sira iha Tasi Tolu kansela tanba daudaun ne'e Ministériu Obras Públiku seidauk hato'o dadus loloos ba Autoridade Munisípiu Dili
"Kona-ba eviksaun Tasi Tolu ami kansela, sei iha prosesu ida husi Ministreriu Obras Públiku, sei hato'o dadus konkretu ida kona-ba kona ba item uma idaidak nian, hafoin ida ne'e mak Prezidente Autoridade fó sai fali data eviksaun, maibé iha tempu badak, to’o Agusto sei iha eviksaun," dehan Artur, Segunda (15/07).
Iha fatin ketak, Xefe Suku Komoro, Eligio José Marçal hateten, asaun ne’ebé ekipa husi Sekretáriu Estadu Asuntu Toponímia no Organizasaun Urbano (SEATOU) halo ne'e ilegál.
“Problema ne’ebé akontese iha 11 Jullu bainhira ekipa ida husi SEATOU tuun ba iha Tasi Tolu, halo asaun ba komunidade sira, maibé sein kuñesimentu husi autoridade, ami Xefe Suku no Administradór ami la hatene, ekipa ida tuun ba obriga komunidade atu hamamuk fatin ne’e ekipa husi ne’ebé, tanba ema hirak ne’e tuun laiha koordenasaun,” dehan Eligio hafoin enkontru ho Polisia Nasionál Timor-Leste, iha Kuartel Jerál Polisia, Kaikoli, Segunda (15/07).
Tuir nia, loloos atu halo eviksaun ne’e tenke fó hatene ba autoridade lokal no autoridade lokal mak fó fali informasaun ba ninia komunidade sira.
“To'o ohin loron ami laiha informasaun mais derrepente iha Kinta semana kotuk ekipa ida direta tuun fó avizu, momentu ne’e kedas ha’u halai ba iha SEATOU, halo konfirmasaun ho Diretór ida mais Diretór ne’e mós la hatene informasaun,.”
"Ekipa SEATOU halo avizu ilegal ne'e fó implikasaun ba estudante sira ne’ebé atu partisipa ezame daruak nian, tanba ami presiza halo koordenasaun pasa informasaun ho notifikasaun ruma ami bele informa ami-nia komunidade sira, ita labele halo asaun mosu derrepente obriga komunidade tenke hamaluk fatin, ida ne'e la di'ak," katak nia.
