Diretór Edukasaun Munisipiu Vikeke Domingos Bradão hatete, estudante sira ne’ebe asesu ba bolsa meritu mai husi ensinu baziku sentral, ensinu baziku privadu no ensinu sekundáriu sira, maibé to’o agora seidauk asesu ba sira nia direitu tanba dokumentu la kompletu.
“Ami nia estudante husi eskola ensinu báziku sentrál no ensinu sekundária privadu no públiku hamutuk 501 seidauk asesu ba bolsu méritu ne’ebé Ministériu Edukasaun oferese ba estudante sira ne’ebé ezame hetan valor di’ak,” dehan nia, iha City 8 Manleuana, segunda (23/10).
Diretór dehan, dokumentu ne’ebé sira presiza atu asesu ba bolsa refere mak hanesan kartaun eleitora, sertidaun batizmu, bileti Identidade, sertidaun kazamentu inan-aman nian hodi loke sira nia konta bankaria.
Nia afirma, Governu oferese bolsa meritu gratuita ba estudante sira ne’ebé hetan valór di’ak iha ezame, atu nune’e osan ne’ebe sira hetan bele sustenta fali nesesidade sira nian.
Maibé, estudante sira la dun tau importánsia hodi trata dokumentu hodi asesu ba bolsu refere.
Tanba ne’e, Ministériu Edukasaun nafatin esforsu servisu hamutuk ho BNCTL, fasilita estudante sira bele trata sira nia konta bankária hodi asesu ba subsidiu refere.
Tuir Diretór Edukasaun Munisipiu Vikeke, ba estudante sira ne’ebé seidauk asesu ba sira nia direitu la’os atu la hetan ona maibé sira nafatin hetan tanba sira nia naran tama ona iha sistema bolsa meritu nian.
Entertante, estudante ne’ebé sai benifisiariu ba bolsa méritu iha Munispiu Vikeke hamutuk 1.032, husi dadus ne’e iha 532 mak asesu ona ba sira nia direitu no na’in mak 501 seidauk iha konta bankaria.
Entretantu, tuir dadus benifisiariu ba bolsa merito ne’ebé Ministeriu Edukasaun iha Oitavu Governu rejista hamutuk 12.927, husi numeru ne'e, Ministeriu Edukasaun selu ona 7.476 no restante nee sei prosesu.
