ME Seidauk Simu Dadus Estudante Ne’ebé Latuir Ezame Nasionál Featured

By Ivonia Varela Outubru 23, 2023 1621
Sekretáriu Estadu Ensinu Sekundáriu Jerál no Tekniku Vokasional Domingos Lemos Lopes. Foto:INDEPENDENTE/Juliao. Sekretáriu Estadu Ensinu Sekundáriu Jerál no Tekniku Vokasional Domingos Lemos Lopes. Foto:INDEPENDENTE/Juliao.

DILI: Sekretáriu Estadu Ensinu Sekundáriu Jerál no Tekniku Vokasional Domingos Lemos Lopes, hatete, Ministériu Edukasaun (ME) seidauk simu dadus konaba estudante sira ne’ebé la tuir ezame nasionál ne'ebé realiza ona iha loron 16 to’o 21 fulan-Outubro 2023.

“Too agora Ministériu Edukasaun nia parte seidauk rona konaba estudante na’in hira mak la tuir ezame nasionál tanba seidauk iha  informasaun husi eskola sira hotu. Tanba ne’e, bainhira iha ona dadus ami sei fó sai informasaun ne’ebé detallus,”dehan nia iha Salaun City8, Manleuana, Dili, (23/10/23).

Iha fatin hanesan, Diretór Jerál Edukasaun Ensinu Deolindo da Cruz hatete, dadaun nee seidauk iha dadus konaba estudante sira neebé la tuir exame nasionál, tanba ekipa neebé destaka iha munisipiu hodi halo monotorizasaun ba ezame nasionál sei prepara hela sira nia dadus bainhira finaliza ona foin submete ba iha Edukasaun.

“Bainhira dadus sira ne’e tama ona, hafoin deside fali konaba ezame nasionál faze daruak ne’e iha ka la iha,”dehan nia.

Enkuantu, iha sorin seluk, Diretór Edukasaun Munisipiu Vikeke Domingos Brandão hatete, iha Munispiu Vikeke estudante ne’ebé naran tama lista hodi tuir ezame nasionál hamutuk 3.326   no husi dadus ne’e nain hitu (7) mak latuir ezame nasionál.

Rekorda katak, iha loron dahuluk ezame nasional, estudante na’in 88 husi ESJ Finantil, mak la tuir ezame.

Kordenadór Ezame Nasionál iha ESJ Finantil Aniceto Berlelo Gouveia hatete, lista estudante ne'ebé hetan ona númeru ezame nasionál hamutuk 720 ne'ebé kompostu husi mane na’in 443 no feto 277. Husi númeru ne'e, iha estudante na’in 88 mak la tuir ezame nasional, ne’ebé kompostu husi mane na’in 59 no feto 29.

Enkuantu, tuir dadus ne’ebé Ministériu Edukasaun rejista total estudante iha teritoriu laran tomak ne’ebé atu tuir ezame nasional hamutuk 56,495, ne'ebé kompostu husi Ensinu Báziku 29,100, Ensinu Sekundariu Jerál (ESJ) 23,256 no Ensinu Sekundáriu Teknika Vokasionál (ESTV) 4,142.

Rate this item
(0 votes)

Independente Digital TV