Ministru Edukasaun Juventude no Desportu, Armindo Maia hateten, Ministériu finaliza ona lista benefisiáriu bolsa méritu no hein de'it publikasaun naran iha Jornál Repúblika hodi halo pagamentu.
“Prossesu verifikasaun dadus ba estudante mellór klasifikadu sira finaliza ona no hein de’it publikasaun husi Jornál Repúblika, bele halo ona pagamentu ba estudante sira,” nia hateten foin lalais ne’e iha Palásiu Governu.
Totál benefisiáriu ne’ebé assesu ba bolsa méritu husi tinan 2022 nian hamutuk 13.517, kompostu husi Ensinu Báziku to’o Ensinu Sekundária Jerál inklui Ensinu Tékniku Vokasionál iha nivel nasionál to’o munisipál.
Atribuisaun bolsa méritu ba estudante mellór klasifikadu prevee iha Lei Grande Opsaun no Planu ne’ebé aprova ona iha Parlamentu Nasionál no Ministériu ezekuta bazeia ba Dekretu-Lei númeru 35/2022 no diploma ministerial númeru 43/2023 ho ninia medida sira.
Ministériu Edukasaun prevee iha Orsamentu Jerál Estadu (OJE) tinan kotuk, liu millaun $7 ba Programa Bolsa Méritu ba estudante mellór klasifikadu iha nível nasionál no munisipál.
