Governu aloka orsamentu rihun $7 husi Orsamentu Jeral Estadu 2016 hodi halo estatua proklamadór RDTL, Francisco Xavier do Amaral, iha Yogyakarta-Indonesia.

Adjuntu Diretór Jeral Ajensia Dezenvolvimentu Nasionál (ADN), Rui da Costa informa, estrutura bazika ba estatua Xavier prontu hotu ona no iha semana kotuk kompaña ne’ebé halo estatua Xavier haruka ona mai Timor-Leste.

“Hain de’it, tempu besik ita sei hatuur,” dehan Rui ba jornalista sira iha nia knar-fatin, Fatuhada-Dili, Sabadu (06/05).

Molok hatuur, nia dehan, ADN sei halo koordenasaun ho Ministru Planeamentu no Investimentu Estratejiku, Kay Rala Xanana Gusmão.

“Nia (Xanana) rasik mak sei hatete kolokasaun ne’e hanusa, atu hateke ba tasi ka hateke ba loromonu no lorosa’e, ne’e depende ona ba iha Maun Boot Xanana,” dehan nia.

Tuir nia, molok 20 Maiu estatua ne’e bele pronto ona, maibé depende mós ba kestaun sira seluk, se atraja entau sei hein loron seluk.

“Posibilidade boot ita sei monta iha (loron) 17 ka 18 fulan ida ne’e. Ami fó ona timeline ba kompañia sira atu finaliza lalais projetu refere no sira dehan konstrusuan remata ona hein estatua mai hatuur de’it ona, ne’ebé ami esforsu iha tempu besik ita espera sei hatuur,” dehan Rui.

Ho estatua husi Saudozu Francisco Xavier do Amaral ne’e, signifika iha Timor-Leste iha ona eroi na’in rua mak halo ona ninia estatua, ida mak Nicolau Lobato no ida seluk mak Xavier do Amaral.