Ekipa advogadu ne’ebé ajuda defende Timor-Leste hodi luta ba fronteira marítima hasoru Governu Austrália nian kompostu husi, advogadu prinsipál Elihli Lauterpache (matebian), Michael Woor no Prof. Vaughan Lowe, Bernard Collaery no ekipa sira seluk tan.

Xanana dehan, kondekorasaun ne’e nu’udar agradesimentu aas husi Estadu Timor-Leste hodi rekoñese no valoriza ekipa advogadu sira nia luta ajuda Timor-Leste manan fronteira marítima.

“Ha’u haruka ona karta ba Prezidente Repúblika atu kondekora ita nia advogadu hotu ne’ebé ho matenek defende ita nia territóriu tasi”, dehan nia, iha Sede CNRT Bairru-Grilos, horisehik.

Xanana dehan, povu Timor-Leste tenke orgullu tanba, advogadu sira nia matenek fó susesu ba timoroan sira.

Xanana sente kontente, tanba Timor-Leste manan Austrália ho funu ibun no funu kakutak ne’ebé Estadu rua diskute iha meza hodi hetan solusaun problema fronteira marítima to’o Austrália rekoñese no asina liña baliza tasi. iha ONU.

Konsulta Ekipa Advogadu Kona-ba GS

Iha parte seluk, Xanana dehan, TL manan ona funu iha fronteira marítima, maibé sei hasoru hela funu ida atu dada kadoras kampu mina Greater Sunrise mai Timor.

Kona-ba luta ne’e, Xanana rasik koordena ona ho ekipa advogadu TL nian hodi haree solusaun tuir Estadu TL nia hakarak.

“Funu boot ida ita manan tiha ona, maibé funu ki'ik ida tan maka ita hakarak mina mai Timor,” tenik nia.

Nia husu ba Timoroan hotu-hotu hamutuk ho Igreja no hamulak ba rai lulik no matebian hotu hodi tulun TL manan tan vitória boot dada mina mai TL.