DILI: Igreja Katólika iha Timor Leste kongratula Xefe Negosiadór ba Delimitasaun Fronteira Maritima Xanana Gusmão ho esforsu makas mak Timor Leste hetan Vitória ba Fronteira Maritima Permanente (FM).

Tanba ne’e, Padre Angelo Salsinha husu ba Sarani Timor Leste tomak atu kontinua reza makas ba xefe negosiadór delimitasaun fronteira Maritima ho ekipa ne’ebé hetan susesu luta ba soberanu Tasi Timor-Leste.

Iha Selebrasaun misa Agradesimentu, Padre ne’e dehan, Igreja hamutuk ho Veteranu no povu Timor Lorosa’e hato’o benvindu ba maun boot Xanana Gusmão ne’ebé sai pesoál importante ba negosiasaun FM.

Esforsu Xanana ho ekipa negosiadór inklui advogadu sira mak konsege TL hetan ona rohan ba Fronteira Maritima.

“Maromak nia tulun ho nia grasa no matebian sira nia tulun ikus mai lori duni rezultadu di'ak ba rai Timor no povu Timor ninia di’ak,” dehan nia liu husi Omilia Misa agradesimentu iha Sede CNRT -Bairru Gruillus-Dili, Horisehik.

Lori Igreja no sarani katólika nia naran Agradese no fó obrigadu wain ba maun Boot Xanana Gusmão ne’ebé durante ne’e halo negosiasaun ba lina tasi entre Timor Leste ho Austrália ikus mai lori novidade foun ba povu iha rai doben ne’e.

“Ita nia Maromak fó fiar ba Xanana Gusmão nu’udar Xefe negosiadór hodi diskute fronteira maritima ho nasaun boot konsege hetan rezultadu di’ak,” dehan nia.

Iha fatin ketak, Eis Sekretáriu Estadu Juventude Desportu (SEJD), Leovigildo Hornai hatete, rezultadu Fronteira Maritima ne’e susesu boot ida ne'ebé Timor Leste hatudu ona ba mundu ho ninia kapasidade.

“Ha’u hakarak apela katak rezultadu loloos Timor Leste manan tiha ona. Tanba ne’e labele politiza sasan sira,”dehan nia Iha Otél Timor, foin lalais ne’e.

Tanba ne’e, nia dehan, Povu TL tenke orgullu katak manan ida ne’e la’ós ba rikusoin de’it, maibé manan ida liu husi matenek ho kapasidade ne’ebé timoroan iha.