Lider sira ne’ebé sai hanesan sentrál ba ema hotu maka hanesan Kay Rala Xanana Gusmão, José Ramos-Horta, Francisco Guterres ‘Lú-Olo’, Mari Alkatiri no Taur Matan Ruak.

Partidu ida labele reklama katak lider hirak ne’e sira nian. Maibé ema sira ne’e lider nasionál ba ema timoroan tomak nian.

“Labele iha partidu ida mak claim katak ne’e sira nia lider mesak de’it. Tenke tau sira hanesan lider sentrál ida ne'ebé sai autór prinsipál no autór moris ba ita nia prosesu ba libertasaun pátria no povu”, dehan nia, eis-Sekretáriu Estadu Juventude no Desportu (SEJD), Leovigildo Hornai, iha Hotel Timor, Sábadu (10/3).

Nia hateten, ema timoroan hotu hahú husi partidu polítiku sira tenke tau sira na’in neen iha fatin ne'ebé aas.

Lider sira ne’e, tuir nia, sai modelu no verdadeiru ba Timor nia luta to’o ohin loron hetan duni ukun-aan. Tanba ne’e, laiha ema ida no forsa polítika ida iha nasaun ne’e mak hateten de’it lider sira ne’e, sira nian mesak.

“Tenke tane duni figura sentrál sira ne’e no tenke dignifika sira nu’udar lider timor nian duni. Nune’e, laiha ema ida no partidu ida mak sente sira nian mesak”, tenik Leovigildo.

Tanba ne’e, sosiedade no partidu polítiku sira labele haree Xanana Gusmão hanesan lider partidu polítiku. Buat sira ne’e hanesan parte ba prosesu ida para bele hatuur loloos prinsípiu polítiku valór demokrasia no objetivu demokrasia iha país ne’e.

Timoroan hotu hatene katak maun boot Xanana hakerek tan istória foun ida ba mundu iha luta ba soberania Timor nian kona ba fronteira marítima. Tanba ne’e, laiha partidu polítika ida mak bele hateten sira la suporta, la apresia no la orgullu ba Xanana, tanba la'ós reprezenta partidu ida nian.