Iha dekretu lei, bandu komunidade atu halo festa, hanesan festa kazamentu, festa tinan, festa kore-metan, no bandu festa sira seluk ne’ebé halibur ema ema liu na’in lima (5).
Medidas estadu emerjensia ne’e regulariza hafoin, Parlamentu Nasionál (PN), kinta (26/3), aprova ho votus unanimidade a-favor 64, kontra 0, abstensaun 0, no deputadu na’in ida auzensia iha plenaria. Presidente Repúblika Fransisco Guterres Lú Olo dekreta estadu emerjénsia ne’e iha loron 27 fulan-Marsu tinan 2020.
Timor-Leste tenki aplika estadu emerjénsia atu sidadaun hotu-hotu hakmatek ida ida-idaik nia atu nune’e foti asaun luta kontra viruscorona (Covid-19). Ministériu Saúde anunsia katak, ema na’in ida positivu ona ba covid-19.
Estadu Emerjénsia ne’e hahú ona iha loron 28 fulan-Marsu, oras 00.00 too loron 26 fulan-Abril tinan 2020, oras 23:59.
Iha loron dahuluk estadu emeerjensia ne’e aplika, tuir observasaun online INDEPENDENTE ba situasaun einjerál iha kapitál Dili, transporte públiku, mikroleta balun sei halai, loja nesesidade baziku balun, ofisina no loja roupa sei loke. Enkuantu movimentasaun ema ladun maka makaas ona.
