Apoia aihan ne’e nuudar asaun kariedade ba kbit laek sira ne’ebé hasoru hela krize aihan impaktu husi aplikasaun Estadu Emerjénsia iha situasaun nasaun infrenta moras Covid-19.

Nesesidade bazika ne’ebé fahe ba kbit laek iha Atauro, hanesan fos ho nia kilograma 30 hamutuk saka 500, Me Sedaap (Superme) dos 500, mina bimoli ho litru 2 nian hamutuk masa 500.

Apoiu hirak ne’e distribui ba kbit laek sira iha suku lima,hanesan,Villa Maumeta, Makadiki, Bikeli, Beloi no Makili. Kada suku hetan benefisiariu ema kbit laek 100.

Tuir Primeira Dama Cidalia Nobre Mouzinho Guteres hatete, asaun kariedade husi Gabinete Primeira Dama ba komunidade ne’e tuir kbit, ne’ebé servisu hamutuk ho Komisaun Xavier  nian hodi apoiu kbit laek iha Atauru.

“Hanesan ita boot sira hatene Atauru laos situasaun emerjensia deit mak sira presiza aihan, maibé tanba akompaña mós ho mudansa klimatika sira hetan afetadu tebtebes tanba maioria komunidade barak mak agrikultura no peska, tanba sira labele produs aihan ruma tanba udan been ladiak,”dehan Primeira Dama iha Sede Suku Villa Beloi, hafoin distribui aihan ba kbit laek, (30/05).

Espoza Presidente Republika Francisco Guteres ne’e mos realsa liga ho estadu emerjensia movimentasaun ro nakroma paradu nune’e produtu ne’ebé iha atu faan mos laiha ema atu sosa,ho ida ne’e foti desizaun halo asaun kariedade.

Cidalia dehan, tuir lolos apoiu hirak fó ona iha fulan-Marsu liu ba,maibé tanba akompaña mós inundasaun iha sidade Dili.

“Ohin ami foin mai apoiu meszmu la tuir numeru ne’ebé autoridade sira haruka ba maibé responde tuir saida hanesan foos mina, no supermi,ba familia kbit laek sira ne’ebé nesesitas tebes,”tenik Espoza.

Iha fatin hanesan Administradór Postu Atauro, Mateus Belo hato’o apresiasaun boot ba Espoza Presidente Republika, no sente kontente tanba bele halo intervensaun apoiu monetáriu ba komunidade kbit laek iha Atauru.

“Atauro ne’e laos problema de’it tanba Covid-19, maibé problema boot mos ho mudansa klimatika tinan ne’e,afeita tebtebes ba komunidade nia atividade agrikultura tinan ne’e laiha tanba laiha produsaun nune’e ajudus ne’e bele tulun ona komunidade,”dehan Administradór

Benefisiariu Kbit Laek, Maria Freitas De deus mós sente kontente tanba hetan apoiu. Maski nunee, nia husu atu apoiu ne’e laos akontese de’it iha situasaun Estadu Emerjénsia.

Nia espera katak apoiu ne’e bele kontinua iha futuru, tanba nia senti triste tinan ida ne’e laiha aihan relasiona ho mudansa klimatika.  

“Udan la mai, aihan laiha susar atu sustenta ami nia moris no oan sira,nune’e husu governu atu bele kontinua tau matan ba oin tanba mai merkadu atu buka aihan mos susar loos,”dehan Maria.