Iha rejimentu artigu 7 ko’alia kona-ba perde vontade mandatu, se Deputadu sira falta durante sesaun plénaria dala lima tuir-tuir malu, sira automatikamente perde sira nia mandatu.

Tanba ne’e, agora hein de’it, se semana oin sira ativu ona katak sira prontu atu hakruuk ba desizaun Tribunál nian hodi kontinua halo sira nia kna’ar hanesan reprezentante povu iha Parlamentu Nasionál.

Antes ne'e, Deputadu sira husi partidu CNRT no Presidente Parlamentu nasional sesante Arao Noe de Jesus deklara sei la tama iha plenaria tanba sei hein desizaun Tribunal Rekursu ba keixa ne'ebe nia hatoo.

“Maibé ha’u labele ko’alia to’o ona ne’ebá, tanba ita seidauk hare’e talves sira ativu ona, se sira ativu ona, ita agradese, tanba ami nia hare’e kuandu laiha opozisaun ne’ebé mak la tuir plenária ne’e, plenária  la seru ida, tanba monoton la’o kaber loos, ami hakarak ida jogu bonita oituan,” dehan nia, Iha Parlamentu Nasionál, Sesta (29/05).

Nia haktuir, iha Bankada Governu no Bankada opozisaun atu argumentu ba malu, se la’e la seru ida, Parlamentu Nasionál presija sira atu mai plenária.

Kona-ba Tribunál Rekursu hodi indefere Prezidente Parlamentu sesante, nia dehan, Parlamentu simu ona rekursu.

“Prezidente Parlamentu sesante Arão Noe de Jesus Amaral hato’o ba Tribunál sobre votasaun ba destitusaun Prezidente Parlamentu, Tribunál hateten katak ne’e aktu politiku ne’ebé kabe kompetensia deputadu sira nian, atu halo,” dehan nia.

Nia informa, Tribunál Rekursu somente hare’e de’it katak aktu ida ne’e prevee iha rejimentu ka la’e?, se prevee signifika aktu ne’e legal, se la preve mak Deputadu sira halo de’it, ne’e katak  Tribunál mós sei foti desizaun.

“Maibé aktu preve iha artigu 16-B, entaun Tribunál dehan katak aktu politiku kompentensia Tribunál nian la to’o iha ne’ebá atu interven,”nia sublina.