Nia hatete, iha ona konversa no konvite katak iha posibilidade atu prezidente Joko Widodo hala'o vizita mai iha Timor-Leste, tan ne'e nu'udar Embaixadór sei halo konfirmasaun mas sei halo komunikasaun hotu liga ba ida ne'e.

"Ha'u labele halo konfirmasaun iha momentu ne'e maibé mós nu'udar traballu kaza ba ha'u nu'udar embaixadór. Bainhira hala'o knaar iha Jakarta sei esforsu no estabelese komunikasaun hotu-hotu para oinsá realiza karik vizita ne'e di'ak tebetebes ba interese ita-nia nasaun rua nian," dehan nia, iha Palásiu Governu, horisehik.

Nia dehan, hanesan publiku hatene, Prezidente Joko Widodo mós nu'udar hanesan prezidente ne'ebé iha ninia admirasaun, ninia apresiasaun boot tebtebes la'os de'it ba Prezidente Repúblika maibé mós ba Primeiru Ministru, Kay Rala Xanana Gusmão.

"Liu-liu Jokowi ninia apresiasaun bá ita nia povu Timor-Leste ne'ebé iha vontade tomak atu kontinua nafatin estabelese relasaun ne'ebé ke di'ak tebtebes entre ita nia povu rua no nasaun rua," nia akresenta.

Entretantu, Preparasaun ne'e konserteza hala'o entre Instituisaun ho Instituisaun hanesan Ministériu Negósiu Estranjeiru no Koperasaun TL nian ho MNEK Indonézia nian. Tanba ne'e seidauk bele halo konfirmasaun iha ne'e kona-ba Prezidente Repúblika Indonézia Eleitu Prabow Sugiyanto mai ka la mai, maibé intermus preparasaun Instituisaun husi paíz rua ne'e preparadu.

"Maibé bu'at ne'ebé mak ha'u hakarak hatete de'it mak ne'e katak ita nia vontade boot tebtebes atu simu bainhira karik Prezidente Eleitu halo nia konfirmasaun ka manifesta ninia prontidaun atu halo vizita mai ita nia rain konserteza ita prontu atu bele fasilita ho masimu hodi fó susesu bá vizita ida ne'e, maibé iha momentu ida ne'e ha'u labele halo konfirmasaun lai," nia afirma.

Nia dehan, tanba meus sira ne'e hotu tenke iha regras propriu ne'ebé maka sei bele no atu bele fasilita prosesu sira ne'e hotu tanba saida tanba TL nu'udar mós hanesan nasaun soberanu no Nasaun viziñu ho Indonézia.

"Bainhira karik iha vizita sira hanesan ne'e akontese karik ita tenta organiza ho didi'ak para ke vizita sira ne'e bele fó benefisiu no bele fó apoiu máximu bá koperasaun ho relasaun di'ak entre ita nia pais rua," tenik Embaixadór Roberto.