Prezidente Autoridade RAEOA, Rogerio Lobato hatete, nia parte hato’o ona Primeiru Ministru kona-ba konpensesaun justa rai ne’ebé uluk administrasaun okupa ne’ebé uluk selu dolar tolu ($3) kada metru kuadradu, maibé sa’e ba dollar lima ($5) kada metru kuadradu.
“Ha’u ko’alia ho nia kona-ba kompensasaun justa ba rai ne’ebé administrasaun uluk okupa, hakarak selu folin ida ne’ebé sira rasik mak impoen, no ha’u informa ba Primeiru-Ministru katak ami halo deliberasaun ida depois de negosiasaun ho na’in ba rai sira ami hasa’e kompensasaun ho folin ne’ebé uluk sira hakarak fó 3 dolar ne’e bá 5 dolar,” dehan PA RAEOA iha Palasiu Governu, Kinta (01/08).
Prezidente hatutan, Komunidade sira hakarak hasa’e folin, maibé Autoridade sira hateten katak tenki haree mós meius ne’ebé estadu iha, tanba ne’e presu ne’ebé RAEOA dilebra mak $5 pur metru kuadradu.
Nia hatutan, osan ne’e disponível ona, tanba ne’e nia parte sei marka loron hodi konvida Primeiru-Ministru ba to’o iha Oe-Cusse atu partisipa iha seremónia selu rai-na’in sira.
Enkuantu, osan ne’ebé RAEOA prevee atu selu ba rai na’in sira ho montante millaun ida. No rai ne’ebé estadu atu selu mak Fulolo, Suku Costa no Suku Cunha.