Husi númeru nee, na’in ualu (8) nudar sidadaun Timor-oan neebé hela iha Kapital Dili no na’in rua (2) husi estranjeiru.

Kazu sira neebé deteta iha loron 29 no 30 Dezembru 2021, rezultadu teste husi Laboratoriu Australia fó sai iha janeiru na’in rua (2) mak hetan pozitivu omicron.

“Ho nunee, ikus liu ita tan lori amonstra 15 ba Laboratorium Australia iha 28 janeiru 2022, rejultadu mai hatudu na’in ualu (8) mak konfirmadu pozitivu omicron. Enkuantu, too agora total kazu omicron hamutuk na’in 10,”dehan Xefi Departamentu Vijilansia Epidemiolójia iha Ministeriu Saúde, Filipe de Néri Machado, liu-husi konferensia imprensa, iha Palasiu das Cinzas, Kaikoli, kinta horseik (03/02).

Nia informa, sidadaun estranjeiru na’in rua neebé deteta pozitivu, bainhira sira husi rai liur mai tuun, iha  Aeroportu Nikolau Lobato, Komoro, iha loron 30 Dezembru 2021.

Nunee, ekipa vijilansia lori kedan amostra ba Laboratoriu Australia no iha 29 Janeiru 2022 rezultado hatudu positivu omicron.

Nia esplika, kazu hirak nee, maioria asintomatiku dadaun ne'e sira kumpri hela pedidu auto-izolamentu, neebé hetan kontrolu husi institutu sanitaria no mós ekipa husi pilar 7 nian iha Óspital antiga Lahane.

Agora dadaun halo hela tratamentu ba sira neebé deteta iha loron 29 Dezembru dadauk nee rekopera hotu ona no ba hirak neebé seidauk, kontinua halo tratamentu.

Enkuantu, Ekipa Vijilansia sei kontinua foti tan amostra ba hirak ne'ebé positivu hodi ba halo teste no ekipa husi pilar 3 mós sei direitamente tun ba sira nia uma ida-idak hodi halo amostra ka teste ba sira nia familia hotu.

Tanba nee, Ministeriu Saúde husu nafatin ba komunidade sira ne'ebé seidauk simu vasina bele hakbesik ba fasilidade saúde sira, hodi hetan vasinasaun liu-liu ba idade idozu sira.

Asistente Editor: Saturnina da Costa