DILI:Reuniaun liña-ministerial ne'ebé preside husi Primeiru Ministru Taur Matan Ruak ho konsensu aprova ona medidas ida atu estende tan Estadu Emerjénsia (EE) ba loron 30 hafoin fulan ne'e remata.

Tuir Ministru Reforma Legislativu Asuntu Parlamentar (MRLAP) Fidelis Manuel Leite Magalhaes hatete, estensaun Estadu Emerjénsia ne'e mai husi konsiensia liña-ministeriál ho konsensual laiha objesaun ba medidas ne'e.

"Ohin aprova ona medidas estensaun ba Estadu Emerjénsia, maibé nia prosesu la'o normal hanesan bai-bain katak, pedidu atu estende tan Estadu Emerjénsia ne'e sei liu husi Konsellu Ministru depois governu hatoo ba Prezidenti Republika i depois fila-fali mai Parlamentu Nasionál, lalaok sei hanesan ne'e," dehan Fidelis, iha Salaun Ministériu Finansas, (17/04).

Governante ne'e realsa, medidas estensaun ba Estadu Emerjénsia ne'e, ekipa teknika legal sira hahú ona servisu atu haree saida mak presiza, atu bele hato'o tan fali pedidu kona-ba estensaun ne’e hafoin Estadu Emerjénsia ida agora remata.

"Ohin iha diskusaun no desizaun kona-ba estensaun ba Estadu Emerjénsia, ohin membru komisaun halo desizaun ho konsensual katak, liña-ministerial hotu-hotu konkorda laiha objesaun ida halo hikás proposta ba estensaun Estadu Emerjénsia ba loron 30 tan,"dehan Fidelis, iha Salaun Ministériu Finansas, (17/04).

Kona-ba regra estadu Emerjénsia, tuir nia dehan, regra no regulamentu sir abele muda banhira iha nesesidade depende ba situasaun COVID-19 nian. Karik iha posibilidade bele implementa rigor liutan hodi limite direitu sidadaun nian.