Ekipa INFPM ba Kupang sosa Aimoruk Featured

By Adelaide dos Santos Marsu 13, 2024 1440
Ekipa Intergradu iha Ministeriu Saude. Foto:Dok/INDEPENDENTE. Ekipa Intergradu iha Ministeriu Saude. Foto:Dok/INDEPENDENTE.

DILI: Ekipa husi Institutu Nasionál Farmasia no Produtu Mediku, iha semana kotuk, hala’o viajen ba Kupang, Indonezia, hodi sosa aimoruk atu bele responde ba situasaun emerjensia iha ospital nasionál no ospital referal sira iha Timor-Leste.

Tuir informasaun, ekipa husi INFPM ne’ebé lidera husi Diretór Ezekutivu, Brigido Simão de Deus, ne’e aranka ba Kupang, Nusa Tenggara Timur, iha Sesta (08/03) no fila hikas mai Timor-Leste iha Domingu (10/03).

Diretór Ezekutivu INFPM, Brigido informa, nia ho ekipa ba Kupang tanba mosu situasaun emerjensia iha Hospital Nasionál Guido Valadares no ospital referal sira, no laiha dalan atu bele atende.

Tan ne’e, INFPM buka hodi koordena ho Konsuladu Timor-Leste iha Kupang atu bele apoiu hodi liga ba kompaña balun iha Indonezia ne’ebé halo produsaun no distribuisaun ba aimoruk.

“Loos duni, relasiona ho situasaun emerjensia, ita laiha dalan, entaun INFPM koordena ho konsuladu Timor-Leste iha Kupang bele ka lae liga INFPM ho kompaña balun iha Indonezia ne’ebé halo produsaun no distribui aimoruk iha Indonesia.”

“Entaun konsuladu Timor iha Kupang liga ba farmasia Kimia Farma iha Indonezia, depois ami hasoru ho Konsuladu Timor-Leste ho ha’u-nia ekipa ba, ami ko’alia maibé iha problema barak hanesan farmasia Kimia Farma labele fa’an aimoruk direitamente mai Timor-Leste tanba nia laiha lisensa esportasaun aimoruk,” informa nia iha INFPM, Tersa (12/03).

Maske nune’e, nia dehan, INFPM buka dalan no konsege sosa duni aimoruk item tolu ho kuantidade kiik, ne’ebé presiza iha sala operasaun.

Aimoruk tolu ne’e mak hanesan Bupivacaine, Ephedrine no Ketamine, ho orsamentu $1.800.

Hafoin sosa aimoruk hirak ne’e, nia dehan, Konsuladu Timor-Leste iha Kupang mak akompaña ekipa INFPM to’o iha fronteira.

Tuir nia, ida ne’e ba dala ikus nian, tanba tuir lei atu sosa aimoruk tenke liu husi tenderizasaun.

“Maibé iha situasaun ida ne’e INFPM laiha dalan seluk entaun buka meius oinsa mak bele responde ba situasaun ida ne’e ho emerjensia,” dehan nia.

Aimoruk ho kuantidade boot sei tama

Portavoz ekipa Integradu Ministériu Saúde, Vidal de Jesus Lopes informa, daudauk ne’e stock out iha INFPM 26% no iha HNGV 13%.

“Husi 13% ne’e, lista ne’ebé durante ne’e aimoruk iha ne’e hamutuk 405 item, husi item hirak ne’e 53 item mak stock laiha ka ekivale no reprezenta 13% mak stock laiha,” informa Vidal iha edifisiu INFPM, Tersa (12/03).

Maske nune’e, nia dehan, iha tempu badak stock balun sei tama tan ho kuantidade boot atu nune’e bele responde ba stock out iha fasilidade saúde hotu.

Iha fatin hanesan, Diretór Ezekutivu INFPM, Brigido Simão de Deus esplika, stock out ne’e dinamiku, ohin 26%, aimoruk balun tama no hatama ba dadus nia persentajen bele tuun, tanba dala-ruma ospital sira bele mai foti kedas.

“Ita haree iha INFPM no HNGV nia persentajen la hanesan tanba INFPM toma konta jerál, iha nivel nasional nian 26% no HNGV 13%, ida ne’e normal, bele responde hela ba fasilidade saúde sira,” dehan Brigido.

Ho prosesu ne’ebé INFPM halo ho fonte Orsamentu Jeral Estadu 2024, konsumaveis item 16 mak tama ona, no produtu ba makina fase raan iha HNGV item 11.

Iha mós reajente vitru item 128 tama ona iha armajen INFPM, balun distribui ona ba ospital no balun sei halo verifikasaun iha INFPM.

“Reajente ba ICU nian, liuliu iha sala ICU nian, 17 item distribui ona, medikamentu item 8, no produtu oxijenio la’o normal hela.”

Hafoin ida ne’e, nia dehan, INFPM hala’o hela prossesu tenderizasaun ba aimoruk atu nune’e bele taka stock out iha fulan hirak ba oin.

“Aimoruk 25 item mak agora daudaun sei iha hela prossesu juri hodi halo hela evaluasaun no 77 item sei loke tender iha semana ida ne’e, atu nune’e prossesu sira ne’e la’o ona ita bele kobre iha fulan rua ka tolu tuir mai,” katak nia.

Kona-ba aimoruk ne’ebé kompaña Sali-Magu Unipesoal, Lda. sosa, Brigido dehan, bazeia ba informasaun husi parte kompaña nian, iha 15 Marsu ne’e aimoruk hahú tama.

“Kompaña Sali-Magu nia kontratu hatama aimoruk ne’e to’o iha loron 27 fulan Marsu tinan ne’e, ne’ebé semana kotuk ami konfirma ona katak ‘imi bele hatama sasan sira ne’e mai ka la’e?’, sira fó ona konfirmasaun mai ami katak komesa loron 15 ba oin sira bele hatama ona aimoruk 531 item, kompostu husi medikamentu 201 item, konsumaveis 79 item no reajente 252 item,” Diretór ne’e informa.

Rate this item
(0 votes)

Independente Digital TV