Tuir nia, iha Timor-Leste, setór edukasaun dezempeña papel importante atu prepara labarik timoroan sira-nia kualidade, ba nasaun nia futuru.

Xefe Casa Civil hato’o ida ne’e, iha nia diskursu bainhira partisipa iha Selebrasaun Aniversáriu Eskola Internasionál Santo António Díli, ba da-6, iha sábadu (05/08).

“Ho hanoin ida ne’e mak Prezidente Republika hamosu vizaun durante nia mandatu konstitusionál, katak labarik husi tinan-3 to’o 5, tenki iha asesu ba edukasaun pre-eskolar, hodi prepara baze ne’ebé forte ba nível edukasaun sira tuir mai”, hatete Xefe Casa Civil iha komunikadu ne’ebé Online INDEPENDENTE sita.

Xefe Caza Civil, konsidera hirak ne’ebé harii eskola, hanesan Eskola Internasionál Santo António, halo ona investimentu boot iha area edukasaun, la’os hein de’it husi Governu.

Nune’e, Xefe Casa Civil kongratula fundadór no manorin eskola ne’e nian no felisita inan-aman sira ne’ebé hili eskola ida ne’e hodi eduka sira oan, tanba kontribui ona hodi hasa’e kualidade edukasaun iha Timor-Leste.

Eskola Internasionál Santo António Díli, hanesan eskola international dahuluk iha Dili, ne’ebé pertense no jere husi timoroan ho padraun edukasaun internasionál.