Koordenador EBF Paralelo Wekatar Leopoldino Alves hatete, eskola refere aula la sufisiente tanba ne'e sira tenki akumula estudante klase rua iha sala de aula ida, kada aula estudante na'in 20 to'o 25.

"Problema ne'ebé ami hasoru mak, tanba estudante klase rua tenki akumula iha sala de aula ida, entaun ida mak implika ba prosesu aprendizajem la'o ladun di'ak," dehan koordenador EBF paralelo Wekatar, Sábado (18/02).

Koordenador haktuir, Eskola ne'e  harí iha tinan 2020, ne'ebé inisiativa mai husi komunidade rasik, ho voluntáriumente sira konstrui sala de aula tolu (3), ne'ebé durante ne'e  estudante sira uza hodi aprende.

"Eskola refere komunidade mak ho inisiativa rasik hodi harii eskola ne'e ho razaun tanba sira nia oan ba eskola la'o dook no balun tenki hakur mota," tenik nia.

Koordenador informa, ho razaun hirak ne'e mak sira husu ba parte relevante atu konstrui tan sala de aula tolu ba eskola refere.

Tanba dadaun ne'e  profesor voluntáriu sira balun transfere ona ba EBF Paralelo Wekatar maibé kondisaun mak seidauk permite.

Enkuantu, Eskola refere husi primeiru ano to'o sestu ano total estudante hamutuk 76, profesor na'in ualu (8), kompostu husi kotratadu Na'in haat no voluntáriu Na'in haat.