Durante Semana ida, Uma 31 hetan Estragus no Ema Nain rua Lakon Vida Featured

By Ivonia Varela Maiu 08, 2023 652
Ekipa Autoridade Protesaun Sivil atualiza dadus dezastre naturais ne'ebe akontese durante semana ida nia laran, iha salaun APC-SEPS, Kaikoli, (08/04). Foto:Ivonia/INDEPENDENTE. Ekipa Autoridade Protesaun Sivil atualiza dadus dezastre naturais ne'ebe akontese durante semana ida nia laran, iha salaun APC-SEPS, Kaikoli, (08/04). Foto:Ivonia/INDEPENDENTE.

DILI: Durante semana ida nia laran, Autoriedade Protesaun Sivil (APC-sigla Português) rejistu komunidade nia uma ne'ebé hetan estragus husi Dezastre Naturais hamutuk 31 iha Munisipiu haat inklui Rejiaun Administrativa Espesial Oekussi Ambeno (RAEOA), no ema nain rua lakon vida.

Diretor Gabineti Relasaun Externa no Komunikasaun Anacleto Caitano hatete, Autoriedade Protesaun Sivil rejistu Dezastre Naturais ho Tipo tolu hanesan Rai-halai, Anin-Boot no inundasaun.

Dezastre naturais ne'ebé akontese ho tipo inundasaun hodi estragus komunidade nia iha Munisipiu Kovalima, Postu Zumalai, Suku Rai-Mea, Aldeia Uma-klaran akontese udan boot hodi hamosu inundasaun estragus komunidade nia uma hamutuk 17, no iha aldeia loron-uma inundasaun estragus uma hitu.

Munisipiu Vikeke, suku Makadiki, Aldeia Kokilaku, akontese udan boot hodi hamosu inundasaun estragus komunidade  nia uma tolu, aldeia Makadiki estragus uma ida. No Rai-halai iha aldeia Roma, Suku Babulo estragus uma ida.

Iha Postu Vikeke-Vila, Suku Balarahai, aldeia Aidak akontese anin boot hodi estragus komunidade nia uma ida.

Enkuantu iha RAEOA, iha Sub-Rejiaun Oesilu akontese anin boot sobu komunidade nia uma ida.

Iha Aldeia Uatu-Lesu  suku Uaimori Munisipiu Vikeke akontese mota lori sidadaun ida to'o  lakon vida kauza husi udan boot. No iha munisipiu Baukau PA. Baguia, Suku Larisula, aldeia Bubuha mos mota lori sidadaun ida ho naran Adolfino Mago Ximenes idade tinan 17 to'o lakon vida.

"Husi Munisipiu rua inklui RAEOA halo ona asesimentu no APC fó ona apoiu emerjensia maibé munisipiu rua seluk hanesan Baukau ho Manufahi seidauk hetan apoiu emerjensia no dadaun ne'e ekipa APC halo hela levantamentu dadus hafoin fó apoiu," dehan nia iha Salaun APC Kaikoli, Segunda (08/05).

Diretor esplika, Dezastre Naturais ne'ebé akontese  hahú husi fulan-Janeiru to'o Fula-Maiu tinan 2023 hodi estragus komunidade nia uma total hamutuk atus Sia (900).

Enkuantu, husi dadus refere ekipa APC halo ona apoiu emerjensia maibé seidauk fó apoiu rekoperasaun tanba sei halo filafali reverifikasaun hodi hatene uma hirak ne'e  tama iha kategori ida ne'ebé.

Tanba tuir lei ne'ebé iha sei uma hirak ne'e sei kategoriza ba parte tolu hanesan aat kaman, aat naton no aat total.

Rate this item
(1 Vote)

Independente Digital TV