Tanba ne’e, CSEP husu ba Komisaun Funsaun Públiku (KFP) atu fó sansaun disiplinar ba profesores sira ne'ebé durante ne'e abandona servisu la iha lisensa hodi partisipa iha atividade kampaña partidu nian.
Ofisial Advokasia CSEP Feliciano Soares hatete, sira nia observasaun nota katak durante prosesu kampaña profesores sira sai hanesan autor importante hodi mobiliza masa husi fatin-fatin hodi ba partisipa iha komisiu polítika ne'ebé mak halo husi ParPol sira.
“Ida ne'e signifika katak durante kampaña profesores sira abandona sira nia servisu hodi halo fali atividade ParPol nian no kontinua abandona estudante sira,” dehan nia iha salaun FONGTIL Kaikoli, Tersa (09/05).
Tuir nia, kuaze komisiu ParPol iha fatin hotu, profesores sira profesores barak mak envolve iha atividade ne'e.
"Ami la iha dadus, profesores hira mak tuir kampaña maibe profesores ne'ebé envolvimentu direita iha kampaña ita hare ne'e iha, barak mak partisipa,”tenik nia.
Tanba ne’e, CSEP husu ba ParPol sira atu halo kampaña labele besik eskola sira tanba sitasaun ne'e sei perturba tebes ba prosesu aprendizajen iha eskola.
“Ezemplo hanesan iha Munisipiu Ermera fatin ba kampaña públiku nian sintuniza entre eskola Sekundariu Jeral Nino Koni Santana-Gleno no Ensinu Báziku Central (EBC) 10 Abrip 99 Gleno. Situasaun ne'e pertuba tebes prosesu aprendizajen iha eskola rua ne’e no durante Presesu kampaña estudante sira labele atende aula tanba situasaun estrundu no barullu iha fatin kampaña,” haktuir nia.
Ho ida ne'e, Ofisial CSEP husu ba CNE atu identifika fatin ba kampaña dok husi eskola atu nune'e nafatin asegura katak, durante prosesu kampaña estudante sira la lakon sira nia direitu atu asesu ba edukasaun ida ho di'ak no kualidade.
