Relasiona ho dezastre ne'e, Xefe Seksaun Relasaun Externa-APC, Nelson Nunes Orleans aprezenta, durante semana ida APS liu-husi Diresaun Sentru Nasional Operasaun Protesaun Sivil (CNOPC) rejistu komunidade nia uma hamutuk 146 iha no ema ida lakon vida iha Munispiu 11 Inklui RAEOA.

Nia dehan, husi dadus nee, uma ne'ebé hetan estragus maioria husi tipo dezastre Anin-boot no inundasaun.

"Uma ne'ebé hetan estragus iha Munisipiu Aileu anin sobu uma lima (5), Ainaro ida (1), Atauro ida (1), Baukau tolu (3), Bobonaro rua (2), Covalima ida (1), Dili rua (2), Ermera neen (6), Lautem haat (4) no Ahi-han uma ida (1), Liquiça 42, Manufahi rua (2), Vikeke 2 no ema ida lakon vida, RAEOA anin sobu uma 14, inundasaun afeita ba uma 55, rai-halai estragus uma rua no ahi-han uma tolu (3),” dehan Xefe iha Salaun Konferensia APC Kaikoli, Segunda (18/03).

Nia afirma, husi dadus ne’e, Autoriedade Protesaun Sivil servisu ho autoriedade munisipiu sira atu halo atendementu lalais ba vitima sira, tanba vitima sira presiza tebes parte husi APC nia tulun tan ne’e APC halo kedas apoiu emerjensia hanesan ai-han no laos ai-han ba vitima hirak ne’e.

Kona ba vítima hira mak sira-ninian uma estragu totál no presiza hetan apoiu rekuperasaun, Nelson Nunes Orleans esplika, normalmente kuandu mosu dezastre, sira-nianekipa tun bá halo uluk verifikasaun dadus iha terrenu. Iha prosesu ida ne’e, fahe ba tipu tolu mak hanesan, aat natoon, aat kaman no aat totál.

Hafoin prosesu ida ne’e maka, foin bele hatene, uma hira mak estragu totál, hodi bele hetan rekuperasaun hosi Governu. Maibé, tanba prosesu verifikasaun bá dadus ba tinan 2024 nian seidauk konklui, nune’e ekipa sira sei presiza tan tempu hodi re-verifika.

Entretantu, Xefe Seksaun Relasaun Externa-APC ne’e akresenta, dadaun ne’e estok ai-han no la’ós ai-han nian sei sufiente iha armájen APC nian, iha nasionál inklui mós iha munisípiu sira, hodi bele atende ba populasaun sira ho karakter emerjénsia, bainhira enfrenta problema dezastre natural.