Prezidente Asosiasaun Tane Konsumidor (ATK) Antonio Ramos da Silva, hateten, hare dokumentu ne´ebe hasai husi Ministerio Finanças ho ninia objetivu mak iha tinan 2023 Governu hakarak hatama tan receitas domestika ba kofre estado hodi atinji $174,9 Milaun.
Nia afirma, governu ninia adopta oinsá hasa'e reseita domistika liuhosi impostu seletivu hasa'e taxa importante porsentu 2,5 to'o 5%.
Nia dehan, objetivu hasa'e taxa konsumu foun hanesan masin-midar kada kilo ida dollar Amerikanu $ 1,00 no bebebidas hanesan Coca-Cola, Fanta, Sungkist kada lata dollar Amerikanu $ 3,00 , hodi kontrola moras ne'ebe daet husi midar.
"Bainhira loja ka distribuidor sira kontinua fan ho folin la normal,por favor hato'o keixa mai TANE, AIFAESA ka ba iha CCI-TL", dehan Prezidente Tane Konsumidor, Antonio Ramos da Silva liu husi Komunikasdu ne'ebe Jornal INDEPENDENTE Asesu, segunda (09/01).
Nia haktuir, durante ne'e, Tane Konsumidor hare'e pontu importante rua importante hato'o ba konsumidor hanesan, dahuluk, Alterasaun ba Lei aduaneira hodi introdus impostu seletivu la sosializa ba stackholder sira, implementa provoka paniku no prejudika konsumidor sira.
Nia hatutan, pontu daruak, la sosializa Dekretu Lei ne´e uluk tan Dekretu Lei foun, atu troka Dekretu Lei tuan ne´ebe sei vigora, tuir lolos fó tempo atu sosializa ho tempu minimu 30 to'o 90 dias hodi informa ba publiku no stackholder sira hanesan operador ekonomika, konsumidor no agentes estado rasik, nune'e implementasuan Lei labele soke hanesan akontese dadaun.
Tanba impostu seletivu ne´ebe mak Autoridade aduaneira introdus mos kona-ba importasaun veikulu inklui impostu foun ba konsumu.
Nia dehan, Laiha komunikasaun di'ak entre Ministeriu relevante sira, alterasaun Lei aduaneira ne´e na'in mak Ministeriu Finanças, maibé la iha komunikasaun ho Ministeriu Turismo, Comercio no Industria hodi regula ba atividade komercial sira. Tanba tuir Dekretu Lei Nº 29 tinan 2011, kona-ba " Preço justos" Distribuidor sira labele faan sasan liu porsentu 10-15% no Loja ka faan tutan sira labele ultra passa porsentu 20%.
Nia dehan, iha kinta-feira, 05/01/2023, iha distribuidor balun hasa'e folin produtu hanesan Masin midar no bebidas, sa'e liu 100%, ne´e kontra Lei preço justo no regime embarcamentu tanba produto nesesidade bazika labele hasa'e.
Antonio Ramos afirma,Taxa Importasaun Timor-Leste kiik liu iha ASEAN, foin hasa'e de'it 2,5% ba 5% labele aproveita hodi hasa'e folin la normal, prejudika konsumidor sira.
"Se folin Coca-cola kaixa 1 folin antigu $6 sa'e ba 18 per caixa ne´e liu ona 100% ital. Hanesan mos masin midar, hasa'e husi folin ne´ebe atual la ho normal ka liu ona 100% ne´e kontra Lei no krime. Distribuidor sira labele aproveita hodi hasa'e folin nesesidade basika, kontra Lei preço justo no dekreto lei embarcamentu ne´ebe mak limite labele hasa'e folin makaas ba nesesidade basika", katak nia.
Nia haktuir, kona-ba asuntu refere TANE Konsumidor mos hato'o ona ba Autoridade Aduaneira kona-ba Partisipasaun TANE ba prosesu Elaborasaun Alterasaunba Dekretu Lei Nº 30 de 2011, 27 de Junho kona-ba importasaun veikulu.
