Peskizadór AJAR, Inocençio de Jesus Xavier hatete, kazu Padre Abito ho kazu José Bernardo husu ba defensór públiku liu-liu ba advogadu sira ne'ebé kaer kazu mak tenke halo servisu maka'as nune'e atu kazu ne'e bele la'o.
Nia dehan, Ministériu Públiku tenke halo servisu lalais hodi lori prosesu ne'e ba oin labele hanesan ne'e ema kestióna imi nia servisu povu selu imi servisu hanesan ne'e.
"Ministériu Públiku aselera kazu sira hanesan ne'e labele dada kazu ne'e tanba povu presija hatene, tanba semana kotuk vitima José Bernardo nia inan hasoru AJAR depois ba hasoru PSIK husu loron 30 tan ne'ebé ami mós hatete hela ba família vitima dehan pasiensia hein to'o loron 30 se loron 30 laiha mak ita ba husu fali tanba sá mak prosesu la la'o ema presija hatene informasaun lalika kaer segredu justisa hodi ignora lia loos ba ema sira," dehan Peskizadór AJAR Inocencio de Jesus Xavier ba jornalista jornál INDEPENDENTE iha nia kna'ar fatin Faról, Segunda (9/1).
Nune'e, husu Tribunál atu funsióna di'ak, AJAR apoiu funsionamentu Tribunál maibé mós dezafia funsionamentu Tribunál sira, orgaun judisiáriu sira ne'e tenke servisu ho lalais.
"Ami husu ba defensór públiku Estadu selu ne'ebé tenke servisu ho lalais ho sériu," hatete nia.
Molok ne'e, Ministériu Públiku liu husi Prokuradór Titulár Jacinto Babo delega ona kompeténsia ba Polísia Siéntifiku Investigasaun Kriminál (PSIK) hodi loke investigasaun ba kazu asidente tráfegu ne'ebé hamate Padre Abito José Brites Casimeiro, iha área Dare, Postu Administrativu Nain Feto, Munisipiu Dili iha loron 22 Augostu 2022.
Alende ne'e, Ministériu Públiku mós fó ona delega kompeténsia ba PSIK hodi kontinua loke investigasaun ba kazu matebia José Bernardo ne'ebé deskonfia mate tara an iha sela detensaun Komandu PNTL, Munisipiu Dili.
