Prezidenti BTL.EP Carlos Peloi hateten, BTL asina tan kontratu ho kompaña tolu ne'ebé sai manan na’in ba kanalizasaun bee moos iha munisipiu rua.

Enkuantu, kompaña tolu ne’e mak hanesan, kompaña Timorindu Unipessoal.Lda ho Kua pali Unipesoal.Lda no Kintas das Flores Unipessoal.Lda.

"Kompaña Timorindu Unip.Lda ho Kua Pali Unip.Lda sei halo projetu melloramentu no kanalizasaun bee moos iha kapital postu Lakluta no kompaña Kintas das Flores sei halo kanalizasaun bee moos iha kapital postu Maubara,"nia iha salaun BTL,EP, Kaikoli, tersa ne’e (10/01).

Prezidenti hatutan, tuir kontratu ne'ebé iha, kada projetu iha nia durasaun durante fulan neen (6), karik projetu ne'e mak la remata tuir nia tempu mak kompaña refere sei hetan sansaun.

"Kada projeitu nia durasaun iha fatin rua ne'e to’o fulan neen sei benefisia ba komunidade sira ne'ebé hela iha área refere," tenik nia.

Nia dehan, iha Postu Adminitrativu Lakluta, orsamentu ne’ebé prevee hamutuk dolar amerikanu rihun $789, ida ne’e ba projetu rua hanesan, kanalizasaun no halo servisu reservatoriu hodi fó benefisia uma kain hamutuk 693 ho populasaun hamutuk 4.158.

Enkuantu, iha Postu Adminitrativu Maubara ho nia kustu kuaze dolar amerikanu rihun $559, ne’ebé sei benifisia ba uma kain hamutuk 372 husi populasaun hamutuk 2.232.

"Ita espera katak fulan neen nia laran parseriu sira apoiu husi autoridade lokal sira bele halo servisu tuir tempu ne'ebé fó ona. Nune’e bee moos refere, sei liga mós ba instituisaun hanesan eskola, sentru saude no igrej,"Nia esplika.

Iha fatin hanesan, Diretór Kompaña Timorindo, unip.Lda George Henriques hateten, kompaña prontu realiza servisu tuir akordu ne'ebé sira halo ona ho BTL.EP no sira mós garantia katak servisu sei remata tuir tempu ne'ebé determina ona.

"Ami servisu tuir saida mak iha akordu ne'e, karik mosu dezafiu ruma husi natureza mak ami sei kordena hamutuk fali ho BTL,”hakotu nia.