Sekretáriu Jerál Partidu Demokrátiku, Deputadu António da Conceição hateten, PD sei iha desizaun ruma ba deputadu Adriano do Nascimento ne’ebé auzente iha votasaun Estadu Emerjénsia.

“Seidauk foti (desizaun) tanba ami tenke respeita malu. Ami la hanesan partidu CNRT ne’ebé hanesan maun boot Xanana mak kaer sira hotu”, dehan nia, iha Uma Fukun PN, horisehik.

Nia esplika, Partidu Demokrátiku iha tanba ema sira ne’e hotu-hotu ninia kontribuisaun, tanba ne’e sei konsidera malu no buka forma oinsá ko’alia ba malu.

Tuir nia, kestaun polítika bele ko’alia, maibé komunikasaun ema ho ema labele halo mate.

“Agora nia sei deputadu, seidauk iha prosesu ne’ebé ami halo ba nia, tanba ami hatene katak iha PD uluk ami halo iha La Sama. Maibé agora iha mak ami sira ne’e,” dehan António.

Nia hatutan, laiha tan ema seluk ne’ebé nivel ne’e hanesan maun Mari Alkatiri no Maun Xanana agora iha partidu mak agora iha hela daudaun ne’e.

Kona-ba deputadu auzente iha aprovasaun estensaun Estadu Emerjénsia, nia dehan, deputadu Adriano moras. Segunda-feira mai duni iha Parlamentu Nasionál to’o meiudia fila ho razaun moras.