Iha 22 Abril 2020, partidu CNRT organiza partidu lima seluk hodi deklara koligasaun foun no asina akordu ida, no aprezenta ona dokumentus koligasaun nian ba Prezidente Repúblika.
Koligasaun foun ne'e eziste ho intensaun atu bele forma governu dasia, no indizita ona Prezidente CNRT Kay Rala Xanana Gusmão nu'udar Primeiru Ministru.
Maske nune'e, AMP foun hasoru obstaklu, tanba PR Lu Olo ladauk fó "bensaun" ba sira atu kaer ukun, kondisaun sai susar liu tan bainhira Timor-Leste hasoru surtu Covid-19.
Jogu politiku entre partidu politiku sira kontinua la'o, no ikus mai, KHUNTO mosu hodi fó diferensia.
Iha 29 Abril 2020, KHUNTO deside hodi sai husi koligasaun. Desizaun KHUNTO ne'e automatikamente hamate ona mehi AMP foun atu forma governu dasia.
Liu husi karta ho númeru 037/P.KHUNTO/IV/2020 ne'ebé dirije ba Prezidente Partidu CNRT, Kay Rala Xanana Gusmão, KHUNTO deklara sai husi koligasaun foun ne'ebé forma iha 22 Fevereiru.
Iha karta refere, KHUNTO deklara katak, sira deside sai husi AMP foun tanba to'o ohin loron laiha serteza hodi solusiona impase politika iha TL ne'ebé la'o ona durante tinan 3. Tan ne'e, nu'udar partidu politiku, KHUNTO tenke iha pozisaun politika hodi fó solusaun ba empase refere.
Tuir KHUNTO, situasaun koligasaun AMP foun seidauk hetan konfirmasaun no aseitasaun husi Prezidente Repúblika ba ninia ezistensia hodi fó alternativu ba formasaun governu dasia.
"Partido KHUNTO konsidera ba deklarasaun konfiansa no apoiu tomak husi Sua Excelência Prezidente da Republica Sr. Francisco Guterres Lu Olo ba iha Primeriu Ministru Taur Matan Ruak atu lidera nafatin VII Governu Konstituisional".
"Partido KHUNTO hola parte mós iha estrutura VII Govemu Konstitusional nune'e deside sei fó apoiu tomak ba VII Governu Konstitusional to'o iha tinan 2023," deklara karta ne'ebé asina husi Prezidente Partidu KHUNTO, Armanda Berta dos Santos ne'e.
Ho razaun hirak ne'ebé temi ona, KHUNTO deside hodi sai husi koligasaun AMP foun ne'ebé lidera husi Prezidente CNRT, Kay Rala Xanana Gusmão.
"Ho razaun iha leten Partidu KHUNTO ho konsiente rasik iha momentu ida ne'e hakarak hato'o agredese-wain ba Maun Boot Xanana Gusmão nu'udar lideransa partidu CNRT no AMP ho partidu PD, UDT/F-Mudansa no PUDD ne'ebé durante ne'e ita serbisu hamutuk, ho momentu importante ida ne'e iha situasaun defisil tebes mai partidu KHUNTO atu foti desizaun, maibé tanba haree ba interese povu no ita-nia estadu mak Partidu KHUNTO foti desizaun sai husi koligasaun AMP foun".
Maske sai ona husi AMP foun, maibé KHUNTO deklara sei tane nafatin Maun Boot Kay Rala Xanana Gusmão no prontu atu serbisu hamutuk iha tempu oin ba interese povu no nasaun Timor-Leste.
