Xefe Komunikasaun-APS João de Souza Filipe hatete, munisipiu sanulu ne’ebé afeitadu ba dezastre naturais mak hanesan, Aileu, Ainaro, Baukau, Bobonaro, Dili, Ermera, Lautem, Likisa, Manatuto no Vikeke.
Nia dehan, dezastre ne'ebé akontese iha tipo rua, hanesan, akontese anin-boot sobu komunidade nia uma iha Munisiupiu Ermera hamutuk uma 15, Baukau 14, Bobonaro 10, Likisa Ualo (8), Manatuto neen (6), Dili rua (2), Lautem ida (1), Vikeke ida (1) no Aileu ida (1).
Aleinde, akontese ahi-han komunidade nia uma iha Munisipiu Baukau hamutuk uma neen (6), Ainaro uma ida (1), Bobonaro ida (1), Ermera ida (1) no Ainaro ida (1).
“Apoiu emerzensia ekipa halo ona apoiu imediata, tanba uluk difikuldade iha transporte, maibé agora munisipiu sira iha hotu ona transporte, tan ne'e ekipa husi munispiu hamutuk ho parseiru sira halo kedas apoiu imediata ba vitima sira ne'ebé afeita ba dezastre,” dehan Xefe iha Sala Konferensia APS Kaikoli, Segunda (18/09).
Xefe Komunikasaun afirma, total dadus ne'ebé APS rejista hahú husi fulan-Janeiru to'o Setembro vitima sira ne'ebé hetan estragus hamutuk 2.377, no husi dadus ne'e, ekipa APS sei halo fila-fali reverifikasaun hodi kategoriza fila fali kategori ne'ebé iha ona.
Entaun, hafoin reverifika komunidade ne'ebé iha direitu atu hetan material rekopresaun hamutuk uma-kain 1.106.
Entretantuu, husi dadus ne’e, APS apoiu ona material rekopresaun ba vitíma sira hamutuk 403, kompostu husi Munisipiu Manufahi uma 23, Likisa 62, Dili 71, Kovalima 168, Bobonaro 58, Aileu 33 no Lautem 31 no Ainaro ida (1).
Enkuantu, vitima ne'ebé seidauk hetan ninia direitu ba apoiu rekoperasaun hamutuk 703 uma kain.
