Deputadu Antonio hatete, stock imoruk sempre sai preokupasaun ba ema hotu, ho ida nee MS tenke tau atensaun ba preokupasaun nee lalais.

“Iha munisipiu dili agora dadaun 33% mak stock aimoruk laiha, ho ida nee oinsa mak MS bele esforsu atu nunee bele responde ba nessesidade saude nian ba iha komunidade sira,” dehan nia iha PN, sexta (15/12).

Iha fatin hanesan, Deputada Bankada KHUNTO Olida Guterres informa tan katak,  MS tenke sosa reajente hodi tau iha fasilidade saude sira, liuliu HNGV atu nunee bele fasilidade professional saude sira hodi halo teste ba ema nia moras.

“Hau hanoin Ministra Saúde nia matenek bele hatoo mai iha parlamentu nasional, tanba hau rasik lao ba iha HNGV, maibé reajente laiha duni tanba nee MS tenke hola reajente nee atu nunee bele koko ema nia moras, atu hatene lalais hodi haruka ba rai liur hodi halo atendementu.

Hatan ba preokupasaun nee, Ministra Saude Elia dos Reis Amaral afirma, Nonu governu mai la menta tebes ho stock out neebé mak husik hela iha governu anterior, saida mak mosu iha neebá stock out reajente, konsumaveis  no seluk tan.

“Nonu governu hahu iha fulan jullu, ita hatene katak kuandu hau simu pasta Ministra saude la menta tebes ho stock out neebé mak husik hela iha governu anterior, saida mak mosu iha neebá stock out reajente, konsumaveis  no seluk tan, entaun preokupasaun publiku nian alerta ho ida nee saida mak MS halo ami esforsu makas hodi koloka orsamentu ratifikativu $6 milloens sosa ho karakter emerjensia,” tenik nia.

Ho ida ne,e MS agradese tebes ba iha tribunal de konta tuir dalan neebé mak estadu direitu pressiza hakruk  ba lei tuir dalan sira neebé mak iha, atu nunee responde ba preokupasaun povu nian.

Aleinde ida nee, MS agradese mos ba kompania Sali-magu rasik, tanba hatama ona aimoruk reajente iha armajen INFPM, atu nunee bele rezolve problema saida mak durante nee fasilidade saude sira infrenta.