“CVTL daudaun ne’e treina hela joven na’in 500-resin hodi fó atendimentu primeiru sokoru iha vizita Papa Francisco nian. Maibé, CVTL hein karta ruma hosi Governu hodi fó apoiu la’ós bá primeiru sokoru de’it maibé mós iha parte bee-moos no saneamentu públiku,” dehan Prezidente CVTL, Madalena Hanjam ba jornalista sira hafoin enkontru ho Primeiru-Ministru, iha Palásiu Governu, sesta (19/07).

Nia afirma, CVTL nu’udár organizasaun umanitáriu iha Timor-Leste no sai hanesan auxiliáriu bá Governu ho mandatu tenke hasoru mós Xefe Estadu, Xefe Governu atu apoia dezenvolvimentu liuliu asegura ema hotu-hotu bainhira nasaun ne’e enfrenta krize ruma.

Tanba daudaun TL, iha hela situasaun normál, nune’e CVTL ko’alia ona ho Primeiru-Ministru atu bele tau atensaun tuir Lei ne’ebé iha, foku bá dezenvolvimentu rurál hodi dada bee-moos bá komunidade iha área remotas.

“Durante enkontru, Primeiru-Ministru kontente tebtebes ho rezultadu servisu CVTL nian, ne’ebé durante ne’e dada ona bee-moos bá populasaun iha área remotas iha munisípiu hotu,” katak Nia.

Prezidente CVTL esplika, antes ne’e CVTL simu proposta 400 hosi komunidade, hosi totál ne’e ezekuta ona 140 bá projetu bee-moos no barak mak seidauk ezekuta.

Proposta sira ne’ebé seidauk ezekuta, CVTL hato’o ona bá Xefe Governu atu bele tau konsiderasaun no CVTL mós promete atu buka dalan hodi ezekuta proposta hirak ne’e.

“Durante ne’e CVTL apoia populasaun hodi hadi’a saneamentu públiku, balun konstrui iha Largo Lecidere, Fleixa Maubise no fatin balun tán.  CVTL oferese formasaun kumputadór no lian Inglés bá joven sira, inklui halo doasaun ran bá Hospital Nasional Guido Valadares (HNGV),” Nia hakotu.