Formasaun ba primeiru sokurro ne’e, realiza ona iha loron tolu hahú iha loron 19-21 fulan-Marsu tinan 2024, nune’e formandu na’in-19 kompostu husi mane na’in-7 no feto na’in-12 ne'ebé mai husi média neen (6) inklui média ofisiál husi Sekretáriu Estadu Komunikasaun Sosial (SEKOMS) no Konsellu Impresa (KI).
Sekretáriu Jeral CVTL, Luis Pedro Pinto hato’o agradese ba jornalista sira ne’ebé tuir formasaun primeiru sokorru durante loron tolu (3) husi CVTL, tanba ne’e husu jornalista saida mak aprende ona hanesan bukae ida, atu nune’e bainhira hasoru situasaun emerjénsia ruma iha terrenu bele implementa ona.
Nia dehan, esperansa husi CVTL mak oinsá mak atu utiliza matenek ne’ebé jornalista sira hetan ona, tanba atividade ne’ebé realiza dalaruma mós infrenta risku boot bainhira ba halo kobertura atividade ruma iha terrenu liu-liu iha situasaun emerjénsia.
“Entau koñesimentu sira ne’e hanesan bukae ida ba sira atu nune’e sira bele kontinua halo implementasaun no sira mos bele uza hodi ajuda sira nia familia, viziñu no instituisaun rasik,” dehan Sekretariu Jeral iha Salaun CVTL Formosa, Kinta (21/03).
Luis afirma, iha enseramentu refere jornalista sira hato’o entuaziasmu ba formasaun loron tolu ne’e, maibé sira mós hakarak aprende matéria barak liután atu nune’e hasa’e liután sira-nia koñesimentu kona-ba oinsá atu atende kazu sira seluk.
Iha Fatin hanesan treinadóra CVTL, Joaninha Jacob Mau hatete, durante formasaun loron tolu ne'e jornalista hotu-hotu interesante tebes no sira tuir duni téknika ho prátika ne'ebé treinadór sira fo ba no hatudu duni liu husi simulasaun sira, oinsa atu kesi kanek tohar no seluk tan.
"liu husi parte hira ne'e ami haree katak sira bele duni ona atu halo primeiru sokorru báziku ba vítima sira ne'ebe mak presiza,". nia dehan
Formadóra ne'e mos husu karik iha treinamentu ruma hanesan ohin xefe sira ko’alia katak iha karta ruma husi CVTL ba mak kolega balun bele mai partisipa iha treinamentu tuir mai dala ruma avansadu bele iha loron ida no loron rua importante mak iha báziku ne'e iha ona ema balun aprende kona-ba primeiru sokoru báziku nian.
Iha biban ne'e mos reprezentante formandu husi Tatoli.IP Hortêncio Sanches hato'o agradese ba CVTL ne'ebe fasilita ona formasaun ba Jornalista sira durante loron tolu.
"ida ne'e sai hanesa bukae ida ba ami atu nune'e ami bele implementa iha ami-nia servisu fatin hanesan jornalista bainhira ba kobertura hasoru asidente ruma hasoru dezastre ruma karik ema ruma husu tulun ami hanesan primeiru sokoru fo ajuda ba iha família vítima sira ne'ebé presiza."nia informa
Nia rekomenda ba CVTL, karik ba oin bele fó mós formasaun ba iha jornalista sira seluk ne'ebé seidauk hetan treinamentu kona-ba primeiru sokoru liu-liu ba jornalista sira ne'ebé iha área dezastre no dala ruma hasoru asidente entaun presiza duni atu sira mós iha koñesimentu oituan kona-ba treinamentu primeiru sokoru nian.
