Konsellu Ministrus aprova projetu Dekretu-Lei kona-ba alterasaun dahuluk ba Dekretu-Lei númeru 33/2020, loron 2 fulan Setembru, kona-ba Estatutu Militár FALINTIL Forsa Defeza Timor-Leste ne’e aprezenta husi Ministru Defeza, Donaciano do Rosário Gomes ‘Pedro Klamar Fuik’.
"Iha mós aprezentasaun husi Ministru Defeza kona-ba projetu Dekretu Lei Alterasaun bá Dekretu Lei kona-ba estatutu militár FALINTIL Forsa Defeza Timor-Leste, inisiativa ne'e aprezenta Relasiona ho depois de lei ne'e Implenta ho ita nia Estatutu Militár F-FDTL nian," dehan Vise Ministru Asuntu Parlamentár, Aderito Hugo da Costa, iha Palásiu Governu, horisehik.
Nia fundamenta, Iha inisiativa balu halo Alterasaun ajusta ho prátika sira ne'ebé haree ho dinâmika Dezenvolvimentu F-FDTL nian kontestu atual haree katak iha nesessidade atu halo Alterasaun bá Dekretu Lei ida ne'e nian.
Hanesan estabelese ona iha Programa Governu Konstitusionál IX, atu atinje objetivu sira ne'ebé trasa ona, importante tebetebes maka kontinua atu dezenvolve medidas no implementa asaun sira ne'ebé lori ba prosesu reforma ne'ebé justu no dignu ba militár veteranu sira ne'ebé sei ativu iha servisu.
Ho hanoin ida ne'e, Governu hakarak elimina restrisaun ne'ebé antes ne’e impoin ba militár sira ne'ebé atinje idade reforma, iha tinan 60, hodi labele ezerse tan funsaun militár.
Tanba ne'e, intervensaun lejizlativu ida-ne'e nia objetivu atu asegura katak militár veteranu sira, hafoin reforma, bele, karik sira hakarak, kontinua halo funsaun militár la operasionál ba períodu ne'ebé determinadu. Funsaun sira-ne'e inklui kargu administrativu, apoiu sosiál militár, atividades kona-ba ensinu no formasaun, peskiza, dezenvolvimentu no inovasaun, aleinde área sira seluk ne'ebé prezerva istória militár Timor-Leste nian.
Medida ida-ne'e nia objetivu atu asegura katak legadu husi militár veteranu sira, transmite valores hanesan patriotizmu, korajen no sakrifísiu ba jerasaun aban-bain rua nian.
Projetu Dekretu-Lei ne’e promove mós alterasaun ba durasaun kargu Xefe Estadu-Maiór Jenerál Forsas Armadas (CEMGFA, sigla iha lian portugés) no Vise-CEMGFA, ne’ebé limita mandatu durante tinan tolu, ho posibilidade halo renovasaun ba tinan rua tan, tuir proposta ne’ebé aprova husi Konsellu Superiór Defeza Militár nian.
Ho alterasaun ida ne’e, ne’ebé hala’o besik tinan haat hafoin implementasaun Estatutu Militár F-FDTL nian ne’ebé hakarak atu valoriza kontribuisaun militár veteranu sira ne’ebé reforma no estabelese prazu foun ba kargu lideransa militár nian.
